Lappis vuođđoskuvlaoahppit eai dárbbaš šat geavahit máskkaid. Dávdadilli leamašan seamma sullii mánotbaji, ja danin ráddjehusaid sáhttet ložžet. Muhtun mánáid mielas dat lea buorre, muhto nuppit jotket máskka geavaheami.
– In mun otne šat áiggo geavahit go dat ii leat šat bággu, muitala Jose Hautala Anára skuvllas.
Hautala mielas máskka haga lea álkit vuoigŋat ja bealljit eai bávččas jo máska ii deatte.
Anára skuvlla oahppi Ánte Mihkkal Safronov lea geavahan máskka gávppis ja dalle go lea fitnan Roavvenjárggas. Son lea duđavaš go skuvllas ii šat máskka dárbbat geavahit.
– Dat lea buorre go ii dárbbaš daid máskkaid geavahit go mus lea ástmá. Dat lea buorre dál go ii dárbbaš geavahit dan, lohká Safronov.
Vaikko máskka ii šat skuvllas dárbbat geavahit, nu muhtimat goit háliidit dan coggat.
– Mun háliidin bijat dan dan dihte go lea velá korona jođus, muitala Anára skuvlla oahppi Noosa Hautala.
Maiddái Norggas ja Ruoŧas ložžegoahtán ráddjehusaid
Lávvordaga rájes Norggasge ii leat leamašan šat dárbu geavahit máskka earret jus gullá riskajovkui dahje ii leat váldán koronavirusboahkuhusa.
Sihke Norggas ja Suomas Lappi buohccedikšunbires koronai buohccán olbmo eai bija šat erremii. Suomas koronai buohccán galgá bissut ruovttus nu guhká, go dávda sáhttá njoammut, ja Norggas olmmoš galgá bissut ruovttus njeallje beaivve.
Ruoŧasges leat burgán olu koronavirusráddjehusaid, go olbmuin lea alla immunitehta ja omikron-variánta ii galggalii leahkit nu váralaš. Boahkutkeahtes rávesolbmot ja riskajovkui gullevaš olbmot berrejit goit leat várrogasat ja garvit čoahkkanemiid.
Beaivvi ságaid ja Yle Ođđasiid Sámis sáhtát maid guldalit Yle Areenas.
16.2.2022 dii. 09.00 Divvojuvvon dieđut: Jose Hautala namma divvojuvvon. Árat muitaleimme su namman Joni Hautala. Divvojuvvon diehtu ahte skuvlamánát leat 3.–4. luohkkás eaige 4.–5. luohkkás. Lasihuvvon video.