Pâʹsslašttâm-mannu rääʹjest restraanti äävaiåårramääiʹj di äʹššneǩmieʹri kuõskki rääʹjtõõzz päʹcce meädda ââʹnnmest juõʹǩǩåʹrnn Lääʹddjânnmest. Tät miârkkšââvv tõn, što restraantin vuäiʹtte juäʹtǩǩed takai jieʹllem, mâʹte ouddâl koronapandemia.
Aanarlaž restranttpõõrǥâsnekka tät lij jõnn hiâlpummuš.
– Ââʹn lij šiõǥǥ toobd, ko äävaiåårramääiʹj da restrantt-tuâjj lie eʹpet jiijjân ǩiõđin. Teänab jeäʹp taarbâž ǩiõččâd, måkam rääʹjtõõzz puäʹtte jeeʹres paaiʹǩin. Kâʹl ååskam juʹn puõʹttiäigga da tuõđi rämmas miõll lij, mušttal Issu Suoninen.
Rääʹjtõõzzivuiʹm leäi aaiʹji mieʹldd samai vaiggâd
Ođđeeʹjjmannu rääʹjest Lääʹddjânnam restraantin lie ouddmiârkkân rääʹjtam äʹššneǩmieʹrid di alkohool kaaupšummuž määŋgnalla. Vaajtõõlli rääʹjtõõzz lie leämmaž vaiggâd restraant vuäʹmsteeja.
– Täk kueʹhtt eeʹjj lie leämmaž vaajtõõlli. Ouddâl meeʹst leʹjje live-čuäjtõõzz juõʹǩǩ määnpââʹj da korona diõtt jeäʹp vuäittam tõid jäʹrjsted. Jeäʹrben äävaiåårramääiʹj leʹjje vaiggâd da kâʹl ođđeeʹjjmään leäi pukin vaiggumus tõi vueʹzzeld, mušttal Suoninen.
Håʹt rääʹjtõõzz tääkkle kõrrsânji, lij Suoninen rämmaš, što čõõđ tän ääiʹj äʹššneeʹǩǩ kuuitâǥ joʹtte da restrantt leäi äävai juõʹǩǩ peeiʹv.
Ââʹn vuäitt juʹn mäʹcced siõmmnai siõmmnai takai jieʹllma, kååʹtt leäi ouddâl korona-ääiʹj.
– Luõʹttjeeʹl da vaareeʹl vueiʹttep ââʹn jäʹrjsted ǩeâđđa eʹpet live-čuäjtõõzzid, håʹt-i muđoi tät jieʹllem maaiʹlmest lij tuejjeʹmen rääʹnes põõlv mij pâʹjjel, mušttal Suoninen
Lââʹzz sääʹmǩiõllsaž ođđsid vuäitak ǩiõččâd Yle Ođđâz-seeidast da kuvddled Nuõrttsäämas-seeidast Yle Areenast.