Sámi allaskuvlla oahpaheaddjistudeanttaguovttos hálideaigga guorahallat dan, makkár oahppanbiras gárdebáiki lea. Soai leaba čuvvon gárdeskuvlla doaimma Ohcejogas.
Dutkamuš vulggii das, go oappážat Máret Ingá Länsman ja Risten Rávná Länsman leaba ieža boazodoalus bajásšaddan ja vásihan skuvlavázzima maiddái gárddi luhtte.
– Go álggiime oahpaheaddji ohppui de smiehtaime, ahte mo fidnešeimme uhccán dutkon boazoealáhusa dutkanfáddan. Bođiime dan bohtosii ahte fertejedne dutkat, ahte mii doppe gárdeskuvllas dáhpáhuvvá oahppama dáfus, muitala oahpaheaddji Máret Ingá Länsman.
Gárdeskuvllas oahppá gulahallama boazoságaid bokte
Boazoságat skuvlašiljus -másterdutkamuš buktá ovdan dan, mo sámegiela oahpahus sáhttá čađahuvvot gárdebáikkis.Oahppit bajásgessojuvvojit gárdebáikkis boazoealáhussii oppalaččat. Biras ja oahppiid iežaset doaimmat gárdebáikkis guovdálastojuvvojit oahpahusas nu, ahte sii ságastallet ja čállet boazoságaid birra sámegiela oahpahusas.
Boazoságaid birra hállan ja čállin čatná sin boazodili sosiála birrasii ja addá hárjánumi kultuvrra siskkáldas gulahallamii. Oahpahusa vuođđun leat sámiid iežaset árvvut ja dárbbut gárdebáikkis.
Dutkamuša bohtosat čájehit, ahte go oahppanbirrasa sirdá guovdu duoddara, de oarjemáilmmi váikkuhus lea olu unnit go ii gullo telefonge albmaláhkai.
– Oahpaheaddjit dalle dustet earálahkai ja buorebut čađahit oahpahusas daid vugiid main lea vuođđu eamiálbmotkultuvrras, sámekultuvrras ja sámekultuvrra dárbbuin ja eandalii boazoealáhusa dárbbuin, čilge Máret Ingá Länsman.
Gárbebáikkit leat maid rievdan 30 jagis
Dán másterbarggus dutkanvuohkin lei nu gohčoduvvon skuvlaetnografalaš dutkan, mii lea čađahuvvon kvalitatiivalaš dutkanvugiin. Dutkanmateriála lea buvttaduvvon oassálastiáicamiin ja jearahallamiiguin, ja dat buktá ovdan maiddái oahpaheaddjiid ja vánhemiid jiena.
Okta fuopmášupmi, man diehtoaddit loktejedje oidnosii, lei dat man dehalaččat áhkut ja ádját leat gárdebáikkis.
– Sámi servodat lea nu rievdan 30 jagis, ahte álgoáiggiid dán gárdebáikkis ledje dábálaččat oahppiid guktot vánhemat. Dál mii leat dan dilis ahte nubbi, dábálaččat eadni, bargá boazodoalu olggobealde beaivebarggus iige sáhte boahtit gárdde lusa beaivit. Go áhkut ja ádját leat gárdebáikkis, de leat sii fuolaheamen ja gohkkemin mánáin, muitala Länsman dutkamuša bohtosiin.
Másterdutkamuš lea ovdanbuktojuvvon koronadili geažil gáiddusin Sámi allaskuvllas guovvamánu 9. beaivve 2022.
Beaivvi ságaid ja Yle Ođđasiid Sámis sáhtát maid guldalit Yle Areenas.