Bagadalli rávve dan, makkár dássidis lihkastagain justa galgá čuvdi guoskkahit bissu báhcahaga ja mo galgá báhčinbohtosa čuovvut vel bávkaleami maŋŋáge sivtta čađa, ovdalgo de luoitila givvira.
Nuppelogi olbmo, eanaš skuvlaahkásaš nuorat ja de moanat rávesolbmot, leat čoahkkanan guovvamánu ovtta gaskavahku eahkeda Gáregasnjárgga Njálla-hállii hárjehallat báhčima nu daddjon báhčinsimuláhtoriin.
Okta nuoramus hárjehalliin lea Romeo Halonen. Son lea hárjehallan čavčča ja dán dálvvi viššalit.
– Orui dalán dakkár hommá masa mun liikon. Vahkkosaččat lean hárjehallan ja dovddan mo šattan ain čeahpibun juohke geardde. Dainna de lean movttáskan ain eanet, čilge Romeo.
Nuorra Romeo Halonen lea juo jurddašan meahccebivdolobi skáhppoma. Bivdu lea maiddái okta sivain manin Adriana Niittyvuopio hárjehallá simuláhtoriin.
– Liikon dás ja dat lea somá, ja vissa mun dasto goasnu stuorábun manan ealgabivdui, dadjá Niittyvuopio.
Bivdoáigge son unnaoappáinis leamašge juo eatni veahkkin ealgga biergguid čuohppamin.
Bivdosearvi háliidii buoridit astoáiggevejolašvuođaid
Gáregasnjárggas lei bivdiid searvi Karigasniemen Erämiehet ry ohcan ja fidnen Leader-ruhtadoarjaga báhčinsimuláhtora skáhppomii. Searvi ákkastalai dan earret eará dainna, ahte máŋgga báikegottis bivdosearvi sáhttá leat áidna viidát doaibmi searvi ja doaimmainis searvi lasiha astoáiggevejolašvuođaid.
EJB-guovddáš mieđihii doarjaga ja Ohcejoga gieldage leamaš miehtemielalaš ja lea dáhkidan loana dassái go doarjjaeavttut leat ollašuvvan. Gielda maid fállá lihkadanhálla searvvi geavahussii.
Hárjehallanrusttet lea sullii 17 000 euro árvosaš. Dasa gullet earret earáid dihtorprográmma ja guokte givvirlágana (replika) oktan čuovgamearkasivttain.
Báhčinsimuláhtoris leat máŋggalágan geavahanvejolašvuođat nuoraid oahpahallama lassin. Soapmásat hárjehallet dáinna ealggabáhčinlobi čađaheami várás. Nu mánát go rávesolbmotge liikojit maiddái čájehit dáidduideaset báhčingilvvuin.
Hárjehallan galggašii sulastahttit duođalaš bivdodili
Bivdosearvvi ságajođiheaddji Ari Ukkola mielas báhčinsimuláhtor lea dahkan hárjehallama álkibun.
– Dákkár simuláhtor sulastahttá sakka duođalaš bivdodili dahje hárjehallama báhčingiettis. Dát lea buoremus hárjehallanvuohki eandalii dáppe davvin go dálvvit leat guhkit iige báhčingieddái beasa.
Eahpádussii das ahte oahppágo dáinna vugiin duođai báhčit, bivdá Ukkola nuoraid čájehit maid sii leat oahppan. Son lea čielgasit rámis das man oahppavaččat mánát leat.
– Dán go geahččalat de fuomášat ahte galgá duođas báhčit, ii leat doarvái dušše roaškalit dohko guvlui, ávžžuha Ukkola.
Gáregasnjárgga bivdosearvi ordne báhčinhárjehallamiid guktii dahje golbmii vahkus. Searvvis leat sullii 120 miellahtu, muhto simuláhtoriin hárjehallan lea buohkaide rabas, ii dárbbaš leat searvvi miellahttu.
Beaivvi ságaid ja Yle Ođđasiid Sámis sáhtát maid guldalit Yle Areenas.