Norgga Sámediggi lei bovden Deatnogátti gielddaid ja Suoma Sámedikki ovttas ráhkadit Deanu soahpamuša evttohusa, mii galggašii nannet sámi árbevirolaš johkabivddu. Áššis muitala NRK Sápmi.
Ikte vuossárgga čoahkkanedje Suoma ja Norgga sámedikki ovddasteaddjit ja Ohcejoga, Deanu ja Kárášjoga gielddaid ovddasteaddjit ságastallat ja hábmet oktasaš árvalusa Norgga ja Suoma gaskasaš Deanu čázádaga guolástansoahpamuššii.
– Dat, mii hástala min buohkaid, lea gulahallan guovddášeiseválddiide, muitala Norgga sámedikki ságadoalli Silje Karine Muotka NRK Sápmái.
Su mielas lea dehálaš geavahit áiggi sámi perspektiivva buktimii ja oktasaš evttohusa hábmemii.
Norggas ja Suomas gulahallet sierra guđege riikka eiseválddiiguin. Dál ulbmilin leage fidnet sámiide nana ovttasbarggu ášši olis.
– Go bohtet čuovvovaš ráđđádallamat, de mis sápmelaččain leat stuorát hárdut, oaivvilda Ohcejoga ovddasteaddji Sámmol Lukkari ievttá čoahkkima ulbmiliin.
Historihkkár: "Árbevirolaš máhttu luossabivddus hilgojuvvon dálá hálddašeames"
Norgga Sámedikki ságadoalli Silje Karine Muotka buktá ovdán fuola das, mo dálá dilis fuolahit johka- ja mearrasámi árbevieruid seailumis.
Sámi historihkkár oaidná, ahte sámi árbevirolaš diehtu galgá leat oktan váldooassin boahtteáiggi hálddašeamis.
– Dát árbevirolaš máhttu luossabivddus lea áibbas hilgojuvvon dálá hálddašeames. Dat lea áibbas lágaheapme Norgga lága mielde, go guktot diehtovuođut galget leat mielde hálddašeamis. Dat ferte njulgejuvvot, lohká historihkkár Steinar Pedersen.
Beaivvi ságaid ja Yle Ođđasiid Sámis sáhtát maid guldalit Yle Areenas.