Deanu luossabivddu ollislaš gielddus, mii lei diibmá, ii leat joatkašuvvamin boahtte gease. Suopma ja Norga háliidit diktit bivdit luosa oanehis áiggi, vai Deanu bivdoárbevieru bajásdoallan lea vejolaš váttis dilis.
– Ministeriijat leat árvalan, ahte sosiálalaš ja kultuvrralaš sivaid geažil luosa dievas bivdogildosa ii sáhte joatkit. Luossabivddu evttohit joatkit goit hui čavgadit ráddjejuvvon árbevirolaš bivdosiiguin, muitaluvvo eanan- ja meahccedoalloministeriija dieđáhusas.
Suopma ja Norga evttohit dohkkehit luossabivddu nu, ahte bivdit sáhttá beare árbevirolaš bivdosiiguin, buođuin njeallje jándora ja firpmiin guokte jándora.
Dohkkehuvvon bivdobeaivvit leat bivdoáigodaga loahpa bealde. Evttohusa mielde luosa ii oaččoše bivdit ollenge stákkuin.
Ministeriija mielas Deanu luossadilli lea ain heittot ja garra ráddjendoaimmaide lea dárbu.
Eará guliid bivdimii ložžemat
Luossabivddu ráddjema váikkuhusaid geahččalit unnidit dainna, ahte lasihit vejolašvuođaid eará guliid bivdimii. Mátkkálaččaide áigot fállat lobi, mainna sáhttá bivdit unnit, ovtta gieđa dolgevuoggastákkuin.
Báikegotti olbmot oaččošedje bivdit gáttis dahje fatnasis stákkuin, muhto vuokkaid faggemearri lea ráddjejuvvon. Deanus oaččošii maiddái bivdit mearradápmoha.
Dan sajis eanemus mearkkašahtti goržebivdobáikkiide boahtá ráddjehusguovlu, mii guoská buot stággobivddu. Dainna háliidit geahpedit dan, ahte luosat šaddet siidosálašin.
Suoma ja Norgga ráđđádallanboađus lea dál cealkin láhkai njukčamánu loahppa rádjái. Boahtte gease guolástanmearrádusat galggašedje boahtit fápmui cuoŋománu álggus.
Beaivvi ságaid ja Yle Ođđasiid Sámis sáhtát maid guldalit Yle Areenas.