Boaldámušhaddi divru ain ja Ohcejogas lea Suoma divrasamos boaldámuš dál. Divrras hattit váikkuhit olbmuid árgabeaivválaš mearrádusaide. Ovdamearkka dihte ohcejohkalaš Tarja Länsman lohká, ahte boaldámušhattiid dihte lea gártán olu smiehttat iežas johtima.
– Lean dieđusge smiehttagoahtán, ahte gosason mun vuolggán biillain ja gielkkáin. In leat vuolgán dálge čuoiganlupmui ruoktobáikái Suomussalmii, gosa dábálaččat livččen mannan, dadjá Länsman.
Maiddái ohcejohkalaš Sámmol Vuolab árvala, ahte lea buoret geahpedit vuodjima dalle, jus reaisut eai leat vealtameahttumat.
– Jus beare ovtta sajis šaddá dán dihtii orrut, iihan dat dieđusge somá leat go olmmoš hárjánan johttit goas ja gosa háliida. Gal dat ráddje dan lihkadeame viehka mealgat, Vuolab dadjá.
Norgga bealde boahtán táŋkejeaddji: "Lean šohkas"
Dábálaččat kránnjáriikkas leat soaitán boahtit Supmii táŋket hálbbit bensiinna maŋis, muhto eai šat dál. Hattit imaštahttet táŋkejeddjiid olu.
– Mus eai leat sánit, mun lean šohkas, lohká hámmárfeastalaš mohtorgielkávuoddji Jim Ronny.
Suinna ovtta fáro gielkáreaissus lea Rolf Skoglund. Son oaidná, ahte hattit leat divron Norgga dássái.
– Dat leat menddo badjin. Seamma badjin go Norggasge, Skoglund lohká.
Seammá dadjá maid Torleif Balto, guhte lea ovdal láven boahtit Supmii táŋket. Son orru rájá alde ja dál go rehkenastá Suoma boaldámušhatti, de su mearrádus lea čielggas: ii šat áiggo boahtit Supmii táŋket.
– De mun in gal dáppe táŋke. Ovdal gal lean táŋken, muhto in šat. Veahá hálbbit lea dál Norgga bealde, son dadjá.
Ohcejoga hattit Suoma divrasamosat
Polttoaine.net-neahttasiiddu dieđuid vuođul Ohcejogas dieselhaddi lei ikte gaskavahku jo 2,58 euro lihtteris.
Länsman muitala, ahte son lea álgán smiehttat ovdamearkka dihte sihkkeliin johtima, go dál biillain lea nu issoras divrras johttit.
Boaldámušat leat maŋimuš vahkuid divron mealgat. Suomas dieseloljju haddi ii leat goasge leamašan ná badjin. Diesel lea dál jo divraseabbo go 95-oktáva bensiidna. Polttoaine.net-neahttasiiddu mielde diesel gaskamearalaš haddi Suomas lei gaskavahku 2,14 euro.
Beaivvi ságaid ja Yle Ođđasiid Sámis sáhtát maid guldalit Yle Areenas.