Ohcejoga gielddahoavda Taina Pieski muitala, ahte Deanu diimmáš bivdogildosa dihte luossaturisma ii šaddan ja dat lea gieldda rehkegiid mielde dagahan viđa miljon euro vahága gieldda ekonomiijai.
Luossabivdu buktá olu turisttaid Deanu ala juohke gease ja gielda lea bidjan olu návccaid turismabálvalusaide ja fitnodagaide.
Ruđalaš dáhpaid lassin bivdogielddus lea váikkuhan negatiivalaččat maiddái sosiála- ja kultureallimii. Dat lea váikkuhan maid gieldalaččaid buresveadjimii, muitala gielddahoavda.
– Dakkár gielddas, gos sápmelaččat leat eanetlogus, mii leat huksen gesiid hui nannosit dan luossabivdui juohke láhkai, eat dušše ekonomalaččat. Váikkuhus lea stuoris, oaivvilda Taina Pieski.
Gielddahoavda Taina Pieski muitala, ahte gielda ii leat goittotge dárpmehuvvan dainna, baicce dál leat viggamin dahkat struktuvrralaš rievdadusaid gielddas ja ohcat ođđa vugiid ealáskahttit turismma. Gielda lea plánemin ovdamearkka dihte dan, ahte meahccesihkkeliiguin sáhtášii duolbmat Deanu luoddaráigge Gáregasnjárggas Ohcejoga girkosiidii.
Ohcejoga gielda hábme oaivila áššis
Ođđa ráddjenevttohusa mielde bivdit sáhttá beare loahppagease árbevirolaš bivdosiiguin, buođuin njeallje jándora ja firpmiin guokte jándora. Evttohusa mielde luosa ii oaččoše bivdit ollenge stákkuin. Ohcejoga gielddas diehtu ođđa bivdoráddjehusain Detnui ii leat goittot illudahttán jur geange.
Gielddahoavda Taina Pieski muitala, ahte juoga nu lágan ráddjehusat ledje vuordimis ja gielddas lea maid hállu dorvvastit Deanu luossanáli, muhto son imaštallá, leago dát dat rivttes vuohki.
– Ohcejoga gielda lea dál hábmemin oaivila dán áššis. Buohkain mis lea mokta dorvvastit Deanu boahttevuođa, muhto mat leat dat vuogit? Leatgo dat dát, maid ministeriija lea ovttas Norgga ministeriijain evttohan? Vai livččiigo vejolaš árvvoštallat daid ođđasit, smiehtada Pieski.
Beaivvi ságaid ja Yle Ođđasiid Sámis sáhtát maid guldalit Yle Areenas.