Anarâškielân almostuvá tääl eenâb uđđâ luhâmuš ko kuássin ovdil. Anarâškielâ seervist lii merhâšittee roolâ kiirjij almostitmist anarâškielân. Uđđâ kirjeh láá almostum já almostuumin, mutâ puáris kirjeh tuálvuh saje seervi vuárháin.
Tääl servi keččâl peessâđ iärun kiirjijn já tondiet uárnee kirjemarkkânijd taan oho tuorâstuv 17.3. Anarist Sajosist, seervi ihečuákkim ohtâvuođâst.
Taah stuorrâ kirjemereh láá čoggum tom ääigist, ko servi teddilškuođij ennuv kiirjijd. Teddilem šoodâi hälbibân per kirje, mađe eenâb toid teddilii. Talle teddilii suullân 500 pittád ain oovtâ kirjeest. Puáris kirjeh láá eenâb ko anarâškielâg lohheeh.
– Tast ij lah mihheen jiermijd, jis anarâškielâ sárnooh láá enâmustáá 500, te ij lah máhđulâšvuotâ vyebdiđ 500 kirjed, muštâl seervi mediapargee Fabrizio Brecciaroli.
Uđđâ kiirjijd servi ij teddil siämmáá ennuv ko ovdil. Tääl teddileh suullân 100–150 pittád uđđâ kiirjijd.
Motomeh jesâneh láá uážžum nuuvtá kiirjijd
Puáris kirjeh láá seervi vuárhást suullân muáddi tuhháát. Puáris kirjen rekinisteh kiirjijd, moh láá almostum ovdil ive 2020.
Taan ihečuákkim ohtâvuođâst tollum kirjemarkkânij lasseen, seervist puáhtá tiiláđ kiirjijd. Seervi nettisiijđoin uáinojeh meid moh kirjeh seervist kávnojeh.
Motomeh jesâneh láá uážžum kiirjijd meid nuuvtá, mutâ tuoivân ličij kuittâg uážžuđ ruuđâ puáris kiirjijn. Kirjemarkkânijn puáris kiirjijd uážžu peelijn hoddijn.
– Servi lii teddilmist máksám, te ličij pyeri kuittâg maidnii uážžuđ, tuáivu Brecciaroli.
Ulmen almostittiđ vittâ uđđâ kirje jyehi ive
Uđđâ kirjeh almostuveh ubâ äigi lase. Seervi Čyeti čälled -projektijn irâttii movtáskittiđ uđđâ ulmuid čäälliđ já Tuhháát sijđod -projektist jurgâlii nuoráid kiirjijd. Tääl lii joođoost Čyeti kirjed -proojeekt, mon äigin almostiteh jo jurgâlum kiirjijd. Juurdân lii almostittiđ puáttee ääigist čyeti kirjed anarâškielân.
– Kuástidemtoimâ lii Anarâškielâ seervist juátkojeijee toimâ, já ulmen lii almostittiđ nelji teikkâ vittâ uđđâ kirje jyehi ive, iätá Fabrizio Brecciaroli.
Jienâkiirjij almostitmist lii lamaš meid seervist saahâ. Jienâkirjeh láá kal puátimin, mut toi äigi ij lah val tääl, muštâl Brecciaroli.
Kuldâl lase anarâš saavâid tääbbin.