Storyhunters dahje muitalusbivdit -prošeakta lea álgán mannan vahkuloahpa Guovdageainnus. Filbmadahkkit, neavttárat, bagadallit ja govvejeaddjit čohkkejit fámuideaset doaimmas, mas galgá oažžut áigái filbmapilohta.
Storyhunters lea Yle Drámá álggahan ovttasbargu NRK Drámáin ja Internašunála Sámi filbmainstituhtain (ISFI).
Dál leatge bargamin pilohtaoasi ráiddus Guovdageainnus. Neavttárat leat proseassas hui guovddážis. ISFI jođiheaddji Ánne Lájlá Utsi muitala, ahte sii galget mannat gillái ja gávdnat karaktearaid, geaid sii sáhtášedje neaktit dán muitalusas.
– De sii bohtet ruovttoluotta ja lea dakkár storyteam, gos leat bagadallit ja čállit, ja dat leat dál olles fártta čállimin dan giehtačállosa. Vahku loahpas de galgá filbmet oanehisfilmma, fikšuvnna, čilge Utsi.
Pilohtaoassi editerejuvvo dál giđđat ja Utsi sávváge, ahte prošeavtta olis besset maiddái čakčat eará guovlluide Sápmái, maiddái Suoma ja Ruoŧa beal Sápmái bivdit muitalusaid. Proseassa govvejit oppa áigge, vai geahččit besset oaidnit visot, mii govvemiin lea dáhpáhuvvan ja mo proseassa lea ollašuhtton.
Ánne Lájlá Utsi muitala, ahte sápmelašvuohta vuhtto olu proseassas. Sáhka lea sámi muitalusas ja sámegielat fikšuvdnafilmmas, man bargojovkui gullet máŋggat sápmelaččat.
Neavttárat leat Hildá Länsman, Vegard Bjørsmo, Inga Márjá Utsi ja Eila Ballovara Varsi.
Pilohta galgá leat gárvvis miessemánus. Dat ráhkaduvvo álggus gitta loahpa rádjái Guovdageainnus, gos lea ođđa editerenstudio. Dan maŋŋá de mearridit, ovdánitgo prošeavttain nu, ahte stuorra buvttadeapmi beassá álgit. Jus dat álgá, lea sáhka goit ovtta, jus ii guovtti jagi govvemiin, go ulbmilin lea govvet miehtá Sámi 9–10 oasát ráiddu.
Beaivvi ságaid ja Yle Ođđasiid Sámis sáhtát maid guldalit Yle Areenas.