Anarâškielâ servi toolâi ihečuákkim tuorâstuv Anarist. Seervi stuárráámus nubástus lii tot, et servi ij innig huolâd kielâpiervâlijn. Nuuvtpa seervi budjet-uv lii uccom pelimiljovnist ennuv, tääl tot lii nyevt 150 000 eurod.
Seervi jeessânaašijn västideijee Fabrizio Brecciaroli muštâl, et servi lii monâttâm nyevt 14 000 eurod, ko ulmuuh iä lah máksám jeessânmáávsuid. Tääl ihečuákkim meridij, et jis kyevti ihán ij lah máksám jeessân máávsu, te ij lah innig jeessân ige uážu loostâ ige kalender, mon jeessân uážžu ain nuuvtá. Jeessânmáksu lii love eurod ivveest. Jis haalijd leđe jeessân, te kalga uuccâđ uđđâsist jesânin já mäksiđ jeessânmáávsuid.
Seervi lostâtooimâst láá ruttâdemvädisvuođah. Taike lii tai ivij äigin adelâm lostâtooimâ várás torjuu, mut taan ive ij. Tääl kalga smiettâđ, kalga-uv lostâtooimâ kepidiđ, vâi kevttiđ seervi eres ruuđâid toos. Servi lii vuábdám Avveel kielâpiervâltáálu, mut toh ruuđah šiäštojeh eres sajan:
– Mist lii juurdân já tárguttâssân, et ko mediapargee lii hirmâd koskâsâš pargee seervist, et sunjin kalga leđe pälkkiruttâ, iätá saavâjođetteijee Marja-Liisa Olthuis.
Servi fáálá taan-uv ive nuoráid pargo čäälliđ anarâškielâ Wikipedia-artikkâlijd.
Servi almostit taan ive 5-6 nuorâikirjed já meiddei tihtâčuágálduv.
Olthuis juátká saavâjođetteijen
Uásálisteeh ihečuákkimist lijjii lovmat, peeli tain käidusin. Čuákkim väljee jyehi ive uđđâ stiivrâ.
Saavâjođetteijen juátká Marja-Liisa Olthuis, väärrin Jukka Mettovaara. Värisaavâjođetteijen juátká Miina Seurujärvi. Hannu Kangasniemi väljejui suu väärrin uđđâ stivrâjesânin.
Saammal Morottaja juátká čällen, já suu väärrin lii Fabrizio Brecciaroli. Iiris Mäenpää juátká ruttâtuállen, já suu väärrin lii Matti Morottaja.
Henna Tervaniemi meid juátká stiivrâst, já Tiina Jäppinen uđđâ stivrâjesânin väljejui suu väärrin.