Suoma Sámi Nuorat -searvi (SSN) čoahkkanii mannan vahkuloahpas jahkečoahkkimii Oului.
Čoahkkimis válljejedje searvái ođđa stivrra. Searvvi ságadoallin heaiti Enni Similä geigii ságadoalli šluppoha viidáseappot Petra Laitii. Laiti ii leat easkaálgi, muhto lea jođihan searvvi jagiid 2017–2020 ja lea ilus, go fas beassá láidestit nuoraidsearvvi.
– Movttain mun dása fas vulgen. Dál lea korona váikkuhan moadde jagi searvvi doaimmaide oalle garrasit. Iluin min olles joavku vuordá, ahte beassat fas albmalágan dáhpáhusaid lágidit ja dáidda oassálastit, muitala Laiti.
Dán jagi searvvis leat olu doaimmat ja ođđa áššit vuordime. SSN lea lágiideame ovttas Sámiráđiin EU-Sámi -vahkku Brysselis.
– Plána lea, ahte mii vuolgit dohko europarlamentii muitalit sámiid ja eamiálbmotvuoigatvuođaid birra, čilge Laiti.
Loahppa gease searvi fas lea fárus sámekonferánssas Ruoŧa beale.
– Doppe lea maiddái nuoraiddeaivvadeapmi ja dohko mii dieđusge searvat. Hui olu stuorra dáhpáhusat ja prošeavttat ja rájárasttildeaddji ovttasbargu lea dán jagi, muitala Laiti.
SSN galggai ávvudit 30–jagi bálgás juo diibmá, muhto korona geažil ávvudeami šadde sirdit.
– Mii eat dovdan, ahte lea dorvvolaš daid ordnet dalle diibmá. Dárkkuhus lea ávvudit min 30-jagi ávvudoaluid dán jagi bealde. Mii leat fargga beliid dieđiheame dan beaivemearis ja prográmmas, ahte doalut gal šaddet, lohpida Laiti.
Beaivvi ságaid ja Yle Ođđasiid Sámis sáhtát maid guldalit Yle Areenas.