Aanaarlâš nuorâ kištočyeigee Pekka Tervaniemi lii vyelgimin čuoigâđ. Čuoigâmkištoi várás ferttee hárjuttâllâđ iäljárávt, veikkâ taan täälvi tergâdumos kištoh, Hopeasompa-kištoh láá jo čuoigum.
Tervaniemi lii ain lijkkum čuoigâmist já čuoigâmkištoh láá moonnâm pyereest taan täälvi. Ohtâ vuáittu Anarist já nuorâi Suomâ miäštárkištoin sun lâi oovcenubálovváád.
– Kale mun hárjuttâlâm, jiem jyehi peeivi, mutâ kuttâ tijme ohhoost, muštâl Tervaniemi.
Tervaniemi hárjuttâl čuoigâm tälviv savehijgijn já keessiv rullâsavehijgijn. Keessiv Tervaniemi káččá, iälá sávrusalist já vázzá sobijgijn.
Suomâ miäštárvuotâ lii ohtâ ulme suu čuoigâmist. Toho lii vala mätki já taan täälvi-uv láá val čuoigâmkištoh puátimin. Anarist uárnejuvvojeh kiđđuv val Kolleputtâlkištoh já Säämi miäštárkištoh. Säämi miäštárkišto vyeitteeh peesih Kanadan Arctic Winter Games -kištoid. Tervaniemi koolgâi čuoigâđ jo ive 2020 Kanadast, mutâ korona tiet kištoid iä ornim.
– Kolleputtâlkištoh láá majemuuh čuoigâmkištoh, talle lii kesiluámu, povvust Tervaniemi.
Välmejeijee Yrjö Portti: tergâdumos lii mohtâ čuoigâđ
Pekka Tervaniemi välmejeijee aanaarlâš Yrjö Portti muštâl, ete nuorâ čyeigee lii ovdánâm ennuv majemuu kyevti ive ääigi.
– Sun lii álššáá já čeppi savehijgijn. Puátteevuođâst ovdánem puátá ääigi mield, eenâb vyeimi já sävrivuođâ. Viehâ häppilis čyeigee Piäkká lii luándulávt.
Portti lii valmim nuoráid 90-lovo aalgâ rääjist, tast maŋa ko jieš lopâttij kištočuoigâm. Tergâdumos lii, ete nuorâst lii mohtâ čuoigâđ.
Portti arvâl, ete Hopeasompa-čuoigâmkišto lâi Tervaniemi tergâdumos kišto taan tälvi. Vuáittu ij puáttám, mutâ taan tove váddu lâi savehijn.
– Mist lijjii riäidučuolmah, ete ton tááhust moonâi pyereest. Lávurduv Piäká saaveeh ij lamaš tot pyeremus já vástuppeeivi šoodâi saaveehfeilâ. Mist ij lam taggaar čäcišooŋân šiev saaveeh.
Tervaniemi arvâl, ete ij liččii piergim návt pyereest välmejeijeettáá.
– Välmejeijee piäjá munjin ain treeniohjelm já tom čuávum, tast lii iše, arvâl Tervaniemi.
Čuoigâm lasseen puásuikištoh kiäsutteh
Nubbe Pekka Tervaniemi mielâmield kištohommá lii puásuikištoin vyeijim. Sun lii-uv nuorâi juávhust vuáittám kištoin ennuv kollemitalijd. Tääl sun kištottâl rävisulmui juávhust já lijkkoo toos eenâb, veikkâ vuáituh iä vala lekken puáttám.
Tervaniemi eeči, Marko Tervaniemi, lii-uv kulmâlov ihheed vuáijám puásuikištoin já kandâ juátká tääl eejis pálgáid.
Kuldâl lase anarâš saavâid tääbbin.