Vuohčulaš skuvlamáná eadni Raija Muukka lea behtton dasa, mo gielda áigu čoavdit ođđa skuvlalanjaid huksema Vuhččui. Gielddas ledje lohpidan jo guhká, ahte dohko huksejuvvo áibbas ođđa skuvla. Dál gielda leage mearridan, ahte Soađegilis sirdojuvvo modulaoassi Vuhččui, mii giddejuvvo lihkadanhállii.
– Persovnnalaččat jurddašan, ahte dát lea dušše dakkár heahtečoavddus. Doaivvu miel dat modula doaibmá, muitala Muukka.
Maiddái nubbi eadneolmmoš Inga Äärelä lei vuordán, ahte Vuhččui ceaggánivčče áibbas ođđa skuvlavisti.
– Galhan ođđa skuvla livčče leamaš ođđa skuvla. Dálhan dat modula leamaš Soađegilis dakkár gaskaboddosaš skuvlavistin. Dál go dat boahtá Vuhččui, de dat leage bissovaš skuvla, imaštallá Äärelä.
Gielddahovda: Dáinna lágiin fidnet johtilit ođđa skuvlalanjaid
Soađegili gielddahoavda Petri Härkönen lea goittotge duđavaš, ahte lea gávdnon čoavddus, mainna fidne johtilit ođđa skuvlavistti Vuhččui. Doppe leat boahtán olu almmuhusat heajos sisáimmus, muitala Härkönen.
– Mii fertet doaibmat johtilit vai mánát besset dearvvas skuvllaráhkkanussii. Áibbas ođđa skuvlavistti huksen váldá máŋga jagi, dáinna vugiin mánát besset ođđa skuvlavistái jo boahtte čavčča.
Härkönen čilge, ahte ođđa skuvlalanjat eai šatta dušše das, ahte modulaoassi giddejuvvo lihkadanhállavistá gitta. Dohko huksejuvvojit maid ođđa oasit, mat bálvalit olles gili.
– Ođđa skuvlavisti lea plánejuvvon nu ahte gielalaš gáibádusat ollášuvvet. Mielde plánemin leamaš maid Vuohču gili olbmot ja Sámediggi, čilge gielddahoavda Petri Härkönen.
Beaivvi ságaid ja Yle Ođđasiid Sámis sáhtát maid guldalit Yle Areenas.