Fitnodatdoalli Petteri Valle Ohcejogas ii lean hirpmástuvvan ođđasis, ahte eana- ja vuovdedoalloministeriija evttoha luossabivdogildosa dánge jahkái Detnui.
– In lean hirpmahuvvan dán dieđus go gullen guollenáli dili. Ledjen jo vuordiminge dán, muitala Valle.
Su mielas lea buoret ná, jus dainna fidne guollenáli suodjalit ja buorránit johtilabbot, go ii leat luossabivdu.
Valle dadjá gal váillahit dan, ahte beasašii Deanu ala luossabivdui, masa lea mánnávuođas hárjánan.
Fitnodatdoallin son jurddaša maid dan, ahte ii sáhte vuovdit guolástanpakeahtaid turisttaide. Valle dienas ii goittot dán áigge leat šat dušše luossabivddus gitta.
– Mis leat olu turisttat, mat bohtet deike eará bargat, geahččat luonddu. Dieđusge sáhttáhan doppe joga alde fitnat vuojiheamen fatnasiin. Ja de leat eará čáhceduhkoraddanvejolašvuođat, leat kanohtat ja suppilávddit, ja de olbmot sihkkelastet olu duottarmáđiid mielde, logahallá Valle.
Suoma eana- ja vuovdedoalloministeriija lea guorrasan Norgga evttohussii bivddu ollesgildosii. Álggos ministeriija lei evttohan, ahte bivdu livčče lobálaš oktiibuot guhtta jándora árbevirolaš bivdovugiiguin ovdalaš suoidnemánu beallemuttu. Dál goit lea juo nuppi geasi ollesgieldu šaddamin. Cealkámušaid evttohuvvon ráddjehusain vurdet gaskavahku 6.4. rádjái.
Stáhtaráđđi gilddii luossabivddu ollásit Deanu čázadagas vuosttas geardde mannan geasi. Sivvan garra ráddjehussii lei luossanáli heajos dilli.
Beaivvi ságaid ja Yle Ođđasiid Sámis sáhtát maid guldalit Yle Areenas.