Sámediggi čoahkkanii odne gaskavahku ollesčoahkkimii. Áššelistu ii lean dán háve beare guhkki: gieđahallamis lei Sámedikki bušeahttaevttohus jahkái 2023 ja lahtuid nammadeapmi Lappi buresveadjinguovllu sámegiela lávdegoddái.
Vaikko čoahkkin álggii iđđes, de bušeahttaevttohusa gieđahallan goit bisttii bures eahketbeaivvi rádjai, go áirasat jienastedje evttohusa sátnehámiin.
Muhto ii lean sámegiela lávdegotti lahtuidge nammadeapmi nu álki. Ollesčoahkkimii bohte álggos eanet evttohusat sámegiela lávdegotti lahttun go lahttobáikkit leat ja dan geažil Sámediggi mearridii doallat ráđđádallanbottu. Bottus eai goit beassán lahttobáikkiin ovttaoaivilvuhtii.
Sihke Inka Kangasniemi, Anu Avaskari ja Kari Kyrö almmuhedje, ahte leat behtton, go sin lahttoevttohusat eai váldojuvvon vuhtii ja nu sii guđđe čoahkkima. Go muhtin earáge áirasat guđđe čoahkkima seamma áiggiid ja lassin máŋggat áirasat eai lean beassan searvat čoahkkimii, de loahppaboađusin olleščoahkkin ii lean šat mearridanválddálaš.
Čoahkkin joatkašuvai bottu maŋŋá, go eanet áirasat serve
Čoahkkin šattaige fas doallat bottu, jusmat de fidnešedje doarvái áirasiid čoahkkái ja beasašedje vel joatkit čoahkkima. Bottu maŋŋá čoahkkima ožžoge fas mearridanválddálažžan ja čoahkkin beasai joatkkašuvvat.
Jienasteami boađusin Sámediggi nammadii sámegiela lávdegoddái áitosaš lahttun Marko Tervaniemi, Terhi Harju, Klemetti Näkkäläjärvi, Petra Magga-Vars ja Ristenrauna Magga.
Várrelahttun lávdegoddái válljejuvvojedje Iiris Mäenpää, Tauno Ljetoff, Anne-Maria Näkkäläjärvi, Inga Koivisto ja Pirita Näkkäläjärvi.
Nuortalaččaid siidačoahkkin galgá vel nammadit iežas lahtu sámegiela lávdegoddái.
Lávdegotti bargun lea earret eará árvvoštallat, mot guovlostivrra mearrádusat váikkuhit gielalaš vuoigatvuođaid ollášuvvamii, guorahallat sámegielat bálvalusaid dili ja dahkat evttohusaid daid ovddideapmái.
Lappi guovlostivra lea juo árat nammadan lahtuid sámegiela lávdegoddái.
Beaivvi ságaid ja Yle Ođđasiid Sámis sáhtát maid guldalit Yle Areenas.