Sámi Grand Prix -musihkkagilvvus besset dán jagi maiddái geahččit jienastit iežaset mielamiel loaiddasteaddjiid. Fertet vuos ráhkadit nrk.no-siidui geavaheaddjikonttu vulobeale rávvagiid mielde. Muitte ahte sáhtát jienastit gos beare dál leaččat máilmmis.
Jienastansiidu lea eŋgasgillii. Jienastansiidui beasat dás.
Lávlun- ja juoiganosiin leat duopmárat fárus mearrideamen das, geat besset gollefinálii. Sin jienat dahket beali buot jienain ja nuppi bealiges dahket geahččiid jienat. Gollefinálas jienastit dušše beare geahččit ja gollefinála vuoitit vuitet olles gilvvu.
Sámi Grand Prix 2022 lágiduvvo beassášlávvardaga Guovdageainnus. Dán jagáš dáhpáhus sáddejuvvo vuosttas háve maiddái njuolggosáttan Norggas NRK 1 -kanálas ja Suoma bealde sáddaga sáhttá čuovvut Yle Areenas. Sátta álgá lávvardaga diibmu 20.50 Suoma áiggi. Gilvvus leat dán jagi mielde oktiibuot 12 artistta.
Jienasteami láhčima rávvagat
Vuosttamužžan čálit iežat sisa jienastansiiddus dahje ráhkat geavaheaddjikonttu, jus dus eai leat dovddaldagat.
Go beasat sisa siidui, doppe galggašit de oaidnit buot oassálastiid, geaid sáhtát jienastit. Jus it oainne oassálastiid go leat čálihan iežat sisa jienastansiidui, dárkkis dáid áššiid:
- Dárkkis ahte du telefon ja neahttalohkki leat beaiváduvvon ođđaseamos veršuvdnii.
- Geahččal iešguđet neahttalohkkiid degomat Chrome, Safari dahje Firefox.
- Geahččal eará e-poastačujuhusa dahje sisabeassansáni.
- Váttisvuođaid olis váldde oktavuođa: info(a)nrk.no
Ieš jienasteami rávvagat
Čálit iežat jienastansiidui ja vállje guđe guvlui don gulat. Dus leat golbma nuvttá jiena juohke jienastanoasis.
Dušše dat jienat, mat sáddejuvvojit dan áigodagas go jienasteapmi lea rabas, šaddet oassin bohtosiin. Jus it jienas dán áigodagas, de jietna ii lohkkojuvvo. Jienasteami álgin ja nohkan dieđihuvvojit sáddagis.
Gilvvu ráhkadus
Álggus oaidnit lávlunoasi loaiddasteaddjiid ja dan maŋŋáges lea juoiganoasi vuorru.
Go vuos buot guhtta lávlunoasi artistta leat lávlon, de álgá vuosttas jienasteapmi. Dál mearridit geahččit ovttas duopmáriiguin, guđemuš guokte artistta besset viidáseappot gollefinálii.
Seamma láhkai meannudit maiddái juoiganoasis. Vuos oaidnit buot guhtta loaiddasteami ja dan maŋŋá sáhttá jienastit seamma láhkai go lávlunoasisge. Guovttis beassaba viidáseappot gollefinálii.
Gollefinála
Dán oasis loaiddastit álggus guokte juoigi, dan maŋŋáges guokte lávlu. Go buohkat leat juoigan ja lávlon, de álgá eahkeda goalmmát ja maŋimuš jienasteapmi. Dán háve dušše beare geahččiid jienat váikkuhit bohtosiidda, duopmárat eai jienas.
Muitte fal ahte juohke oasis sáhtát jienastit easkka dalle go buot dan oasi oassálastit leat loaiddastan.
Beaivvi ságaid ja Yle Ođđasiid Sámis sáhtát maid guldalit Yle Areenas.