Ruošša bealde unnimus meahccegilážiinge olbmot čájehit dál doarjaga Ruošša soahtedoaimmaide Ukrainas.
Barents Observer neahttaaviissa mielde sihke politihkalaš njunnošat, guovloparlameanttat, gávpogat go maiddái gilážatge miehtá Ruošša ovddidit dál kampánjjaid ja doarjjačoahkkimiid soahtedoaimmaid bealis.
Taymyr guovllus Karaul gilis Ob-joga gáttis eiseválddit lágidedje mohtorgielkástallama doarjun dihte Ruošša soahtefámuid. Logit gielkkát vudje joga jieŋa alde ja dahke gielkkáiguin Z- ja V -bustávaid, mat leat Ruošša deháleamos soahtesymbolat. Vuojedettiin čuojahedje vel Ruošša našunálalávlaga ja gielkástallit šlivgo maiddái Ruošša leavggaid.
Ruošša nuortarittus Tšukotkas fas guovlluhoavda Roman Kopin almmustahtii gieskat iežas Telegram-kánalaš báikkálaš eamiálbmotdánsunjoavkku ovdanbuktima. Dánsunčájáhusas Ergyron-joavku čájeha doarjaga presideanta Vladimir Putinii. Ovdanbuktin nohká dasa, go dánsut ráhkadit “Z” govvosa, muitala Barents Observer.
Maiddái Guoládatnjárggas lágidit olu miellačájehemiid Ruošša soahtedoaimmaid bealis. Beahcán gieldda bormeašttir Andrei Kuznetsov oassálasttii Nikkela gávpogis miellačájáhussii, man ulbmilin lei doarjut soahtedoaimmaid Ukrainas. Bormeašttir maid ávžžuhii iežas Telegram-kánálas olbmuid oassálastit doaimmaide, mat dorjot spesiálaoperašuvnna Ukrainas.
Norgga ránnjágielddat eai leat botken ustisvuođasoahpamušaid
Maŋemuš 30 jagi Beahcáma gielda leamašan lagaš ovttasbarggus Norggain ja eandalitge Girkonjárggain. Ránnjágielddain lea ustitvuođasoahpamuš ja dain leat oktasaš doaimmat ja prošeavttat.
Fuolakeahttá das, ahte Ruošša beale ránnjágielddat dorjotge soahtedoaimmaid, de norgalaččat eai leat botken ustitvuođasoahpamuša. Girkonjárggas lea seammalágán ustitvuođasoahpamuš maiddái Severomorsk gávpogiin, čállá Barents Observer.
Ovddit vahkus Sámiráđđi botkii buot ovttasbarggu Ruošša beale lahttoorganisašuvnnaiguin. Mearrádusa duogáš lea dat, go Ruošša beale sámeservviid ovddasteaddjit leat cealkán, ahte dorjot Ruošša “sierraoperašuvnna” Ukrainas.
Murmánskka guovllu sámi organisašuvdna OOSMO (Public Organisation for the Sámi in Murmansk region) ságadoalli Aleksandr Slupachik morašta Sámiráđi mearrádusa botket ovttasbarggu Ruošša sámeorganisašuvnnaiguin. Slupachik muitala almmolaččat iežas vuostálastit Ruošša falleheami Ukrainai.
Njukčamánus Ruošša beale stuorámus eamiálbmotsearvi RAIPON celkkii, ahte dat doarju Ruošša doaimmaid Ukrainas. Mielde dán cealkámušas lei maiddái Guoládaga Sámi Searvi, mii lea Sámiráđi miellahttosearvi.
Beaivvi ságaid ja Yle Ođđasiid Sámis sáhtát maid guldalit Yle Areenas.