Suoma dorvvolašvuođa- ja kemikálavirgedoaimmahat Tukes lea dohkkehan suopmelaš ruvkefitnodat Element92 Suomi Oy guovlovárrema Eanodaga Ruoššačerrui. Várren lea fámus giđa 2024 rádjai. Ruoššačearru gullá Giehtaruohttasa bálgosii, Gova-Labbaid siidii.
Várrejeaddji Element92 Suomi -fitnodat navdá ovddit dutkamušaid vuođul, ahte guovllus gávdno nihkkel, veaiki ja kobolta. Fitnodaga plánan lea ohcat ja dárkkistit dieđuid guovllu birra. Dan fitnodat áigu joatkit nu guhkás go vejolaš ja hukset báikkálaš oktavuođaid. Fitnodaga mihtomearrin lea guođđit lohpeohcamuša málmma ohcamii maŋimušta nuppi jagi geažes.
Tukes vuostáiválddii várrema njukčamánus. Várrema dohkkeheapmi ovddida málbmaohcanlobi oažžuma. Várren ii vel goittotge atte lobi ohcat, roggat dahje goaivut málmma. Várren ii ráddje eananoamasteddjiid rivttiid dahje eará vejolaš eanangeavaheami dárbbuid dahje plánaid guovllus.
Mearrádusa sáhttá váidit Davvi-Suoma hálddahusriektái miessemánu 27. beaivvi rádjai.
Beaivvi ságaid ja Yle Ođđasiid Sámis sáhtát maid guldalit Yle Areenas.