Suomabeal logahagain lea agibeaivve leamaš earenoamáš árbevierru: go nuppi luohká oahpit šaddet skuvlla boarrásamosin, ordnejit sii dánssaid. Maŋimuš jagiin boarrásiid dánssain lea ságastahttán eanemusat dat, man olu ruđa eandalit prinseassačuvllaide šaddet geavahit ovtta beaivvi dihte.
Dán árbevirrui besset dábálaččat jahkásaččat oahpásmuvvat seamma ahkásaš nuorat Kárášjoga joatkkaskuvllas, go sii bohtet galledit Avvila logahaga. Ovttasbargu lea bistán juo sullii logi jagi, muhto koronapandemiija dagahii dasa bottu.
– Dat lea dehálaš mu mielas šaddat oahppat eanet eará tradišuvnnaid, oahppat eanet das, maid mii eat bargga Norggas. Mu oaidnu lea stuorát šaddan, čilge kárášjohkalaš Stine Lise Nordsletta Somby.
Son illudii sakka, go mátki Avvilii ollašuvai. Son muitala, ahte sii leat beassan ovdamearkka dihte málestit dakkár borramušaid, mat leat áibba ođđasat sidjiide. Gelddolamos goittotge lei ieš dánsun.
Nordsletta Somby ja eará Kárášjoga nuorat oahpahalle beare ovtta diimmu dánssa. Eahkedis, go Avvila nuorat dánsejedje olles álbmoga ovddas, besse maiddái loahpas kárášjohkalaččat čájehit dáidduideaset.
– Lean hui movtta, go mun dusten mannat dánsut. Lei somá, ahte mun muiten buot, mot dat galggai dánsut, moddjá Nordsletta Somby.
Oalle speanta dat lei, muhto bures manai.
– Mun vehá ballen, go leimmet vuosttasin olbmuid ovddabealde. Ballen, jus dánsut boastut dahje dánsut gean nu eará njeaiga. Mun smihtten buot, mii sáhttá geavvat, go čužžon dies, son muitala.
Beaivvi ságaid ja Yle Ođđasiid Sámis sáhtát maid guldalit Yle Areenas.