Yle Sápmi sirdása geasseáigái vuossárgga 20.6. Dat dárkkuha dan, ahte sámegielat tv-ođđasat, Yle Ođđasat ja davviriikkalaš Ođđasat, báhcet geasselupmui Yle kanálain. Sáddagat joatkašuvvet fas 22.8.
Yle Sámi radios Yle Sámi iđit -sátta báhcá geasseáigái eret ja iđida vuosttaš sámegielat radiosátta álgá diibmu gávcci davviriikkalaš Buorre iđit Sápmi -sáddagiin.
Juohke árgabeaivve diibmu 10.00–10.30 gullat min rádioarkiivva bearraliid. Vuossárgga vuorus lea Rohkos, maŋŋebárgga anárašgielat arkiivaprográmma Ellee arkkâdâh, gaskavahku nuortalašgielat Jielli arkiiv, duorastaga davvisámegielat Ealli arkiiva ja bearjadaga vel mánáidprográmma Binna Bánna.
Veaigesátta Dearvva! Tiõrv! Tiervâ! sáddejuvvo dego dábálaččat diibmu 15.00–17.00. Radioođđasat leat juohke árgabeaivvi diibmu 15.30 ja 16.30.
Yle Sámi Geasseguossi-radioprográmma joatkašuvvá maiddái dán geasi. Diibmobeallásaš prográmmas ságastallat miellagiddevaš olbmuiguin iešguđetlágan fáttain. Vuosttaš prográmma lea gullan láhkai vuossárgga 20.6. Juohke vuossárgga veaigesáddagis beal viđa maŋŋá gullat ođđa geasseguossi.
Korona dagahan bottu maŋŋá maiddái Yle Sámi Johtti radio johttá fas miehtá Sámi jearahallamin olbmuid.
Geassebargit lágideaba veaigesáddagiid
Dán geasi gullat Yle Sámi Dearvva!-veaigesáddagis maid ođđa jienaid. Yle Sámi geassebargit Sáárákáisá Seurujärvi, Ida Grønmo ja Janica Gauriloff lágidit Yle Sámi veaigesáddagiid gitta borgemánu rádjái.
Seurujärvi mielas radiolágideaddji bargu lea álggos gelddolaš, muhto maiddái hui miellagiddevaš. Son illuda go beassá muitalit áigeguovdilis ságaid ja guldalit buori musihka.
– Ferte muitit maid visot boaluid ferte deaddit ja dasa lassin geahččalit hállat jierpmálaš ságaid. Hástaleaddji lea doallat jurdagiid ordnegis, vai sánit bohtet albma ortnegis njálmmis olggos, muitala Seurujärvi.
Yle Sámi geassebargin bargaba maiddái Marianne Ketola ja Mira Rauhala. Ketola bargá reporttarin Eanodagas ja Rauhala neahttabargin ja radioođaslohkkin Oulus.
Beaivvi ságaid ja Yle Ođđasiid Sámis sáhtát maid guldalit Yle Areenas.