Henna Aikio ja Ingá Musta savâstâláin mottoom Skammâkove eehid maŋa romanijn, já savâstâllâm jotkui ain viestâi peht. Musta smietâškuođij, ete ličij suotâs, jis suoi puávtáččáin porgâđ taan nuuvt, ete iärráseh-uv pyehtih luuhâđ sunnuu jurduid.
Návt šoodâi Musta já Aikio ohtâsâš sämikielâlâš kulttuur- já taaiđâblogi Sämičolmijguin.
Blogi nommâ lii šoddâm tast, ko suoi halijdává čäälliđ teevstâid säämi čolmij čoođâ já nuuvt, ete sämmiliih čäällih sämmilijd, Musta maainâst.
– Jurdân lii kieđâvuššâđ taaiđâ já kulttuur, mon sämmiliih láá porgâm, já pyehteen mudoi-uv kieđâvuššâđ ucceeblovoid, kolonialism ja taggaar fáádáid, moh kyeskih sämmilijd, muštâl Musta.
Lii kiäldulâš čäälliđ aašijn, main ij lah äššitobdee
Blogimaailm já -teevstah láá Henna Aikion já Ingá Mustan uđđâ ääših. Aikio lii kuittâg čáállám jo muáddi ive Anarâškielâ seervi Loostâžžan kirjeárvuštâlmijd. Musta lii čáállám enâmustáá äššiteevstâid, uđđâsijd já artikkâlijd.
– Mun jieš lam meccisuorgijn teikkâ pirrâdahsuorgijn porgâm pargoid, ete mun jiem lah nuuvt kulttuurolmooš. Kuittâg kiävtám ennuv kulttuur já navdâšâm tast. Tot lii tienuuvt kiäldulâš čäälliđ tagarijn aašijn, main ij lah äššitobdee, Musta čielgee.
Blogi vuossâmuš čaalâ kieđâvuš Siida uđđâ uáivičáitálduv. Čaalâ lii tárguttâs almostittiđ kesimáánu äigin. Musta já Aikio algâttává pargo pyeri movtáin, ko suoi lává vuárdám kuhes ääigi, ete peessâv čäälliđ.
– Munnust láá hirmâd ennuv jurduuh, ideah já fáádáh tääl jo mielâst. Mun jiem tieđe, maht munnust lii äigi čäälliđ já kieđâvuššâđ puoh fáádáid, Musta povvust.
Aikio já Musta Sämičolmijguin-blogi lii finnim 2 000 euro išeruuđâ Sämitige kulttuurlävdikoddeest blogi vuáđudem, paijeentoollâm já siskáldâs pyevtittem várás.
– Kuittag mottoom verd šaddeh koloh, já jis haalijd tärhistiđ kielâ ovdil ko piäjá čalluid puohhâid luuhâmnáál, Aikio čielgee išeruuđâ ucâmist.
Kuldâl lase anarâš saavâid tääbbin.