Avvila rádjejeagárkompaniijas lei ikte vuossárgga oallelágan hušša, go čuođit ođđa soalddátálggut miehtá Suoma bohte álggahit iežaset soahtebálvalusa.
Gáregasnjárgalaš Ánte Tenoranta lei buriin mielain, go viimmat guhká vurdojuvvon beaivi de bođii. Áidna, mii su vehá fuolastuhtii lei friijavuođa manaheapmi. Dego juo dákkár áššiiguin láve, lea Tenorantage gullan guhká skihpáriin ja oahppásiin márkanságaid ja šláddariid das, makkár báiki Avvila rádjejeagárkompaniija duođas lea.
– Skibir lea dadjan munnje, ahte son addá munnje 50 euro, jus lean loahpa rádjái Avvilis. Go dat lea viehka garra báiki ja doppe lea dakkár ceavzinhárjehus, man áigge máŋgasat vulget várra eret, go ii oaččo máŋgga beaivái borrat dahje oađđit albmaláhkái, muitala Tenoranta.
"Váikkuha olu, maid don máhtát gárvvisin"
Soahtebálvalusas dehálaš oassin leat guhkes vánddardanmátkkit, ijaid gohcin ja garra hárjehusat, main albmaláhkai testejit olbmo fysalaš ja psyhkalaš gierdevašvuođa. Tenoranta árvala, ahte Avvilis dehálamos ii goit leat fysalaš foarbma, baicce dat, makkár hárjánupmi ovdalaččas lea.
– Dus ii dárbbaš leat hirbmat, hirbmat, hirbmat buorre foarbma, muhto dat váikkuha viehka olu, ahte maid don máhtát juo gárvvisin. Jus leat leamašan muđuige eallimis meahcis, de don birget dainna doppe, Tenoranta jurddahallá.
Ánte Tenoranta diehtá gal dárkilit, mii šaddá su stuorámus hástalussan soahtebálvalusas: dat, go ii oaččo oađđit nu guhká, go ieš juo háliida. Son lohká, ahte nohkasta vaikkoba bovnna ala, jus váibasat deivet.
– Mun sáhtán oađđit gos beare, jus lean doarvái váiban. Ja dalle dat easkka suhttetge dat stuorra olbmot, jus mun beare nohkastan juohke báikái, čaibmá Tenoranta.
Avvil lea diđolaš válljejupmi, soahtedilisge
Sii leat vuosttažat, geat álggahit soahtebálvalusas nu, ahte ránnjáriika lea fallehan nuppi riikka. Dat lunddolaččat bohciidahttá jurdagiid, go soahtedilli lea boahtán nu lahka. Maiddái Ánte Tenoranta mielas ášši lea vássán áiggiin jorran.
– Galhan dat váikkuha, ahte gal dan smiehttá, Tenoranta vástida.
Tenoranta lea jurddašan maiddái dan, ahte makkár bálvalusbáikái son manná. Avvil ii leat dat buot álkimus, iige eisege soahtedilis, muhto liikká son livččii dohko áigon, leš dilli makkár beare.
Beaivvi ságaid ja Yle Ođđasiid Sámis sáhtát maid guldalit Yle Areenas.