Eamiálbmogiid musihkkafestivála Ijahis idja lea almmustahttán dán jagáš festiválaprográmmas ollislaččat. Festivála lágiduvvo Anáris 19.–20.8.
Juo ovdalis Ijahis idja lea almmustahttán moadde joavkku, mat leat Intrigue, Arvvas ja ISÁK. Dasa lassin festiválas leat maid áibbas ođđa artisttat ja festivála oktavuođas suohttasat.
Festivála veahkkebuvttadeaddji Aleksi Ahlakorpi lea duđavaš prográmmii, mii ovdanbuktá viidát máŋggalágán sámemusihka – nu árbevirolaš luođi go heavymusihkkage.
– Mis lea diená nugo ovttastit dan ođđaáigásaš ja árbevirolaš musihka dán prográmmas, ahte leat vehá earálágán artisttat. Čájehit maiddái dán, ahte makkár iešguđetlágán sámemusihkka gávdno dán áigge, muitala Ahlakorpi.
Áibbas ođđa joavkkut ja guhká vurdojuvvon sámemusihka legendat
– Dál lávddi alde leat artisttat, geat eai ovdal oba leat leamaš mis. Nugo Emil Kárlsen, geas lea almmustuvvan aiddo dán jagi skearru. Son čuojaha festiválas bearjadaga, muitala festivála veahkkebuvttadeaddji Aleksi Ahlakorpi.
Bearjadateahkeda doaluin ja iluin gullat luođi, go feastta buktet Bernt Mikkel Haglund ja juoigit, lohká Ahlakorpi.
Áibbas ođđa joavkku čuojaha maid lávvordaga festiválas. Dat lea nuortalašgillii guoimmuheaddji E'vvan nõmmpei'vv -nammasaš joavku.
– Dat lea ođđa nuortalaš musihkariid joavku ja sin vuosttaš konsearta lea Ijahis ijas dalle 20. beaivve borgemánus. Dien gal ieš vuorddán, ahte beasan sin gullat, dadjá Ahlakorpi.
Ahlakorpi muitala, ahte dál sii bastet maiddái vástidit olbmuid sávaldagaide, go Angelit-joavku goargŋu lávddi ala.
– Lean máŋgii gullán, olbmot leat sávvan, ahte besset Angeliid oaidnit min lávddi alde, de dán jagi dat lea vejolaš.
Ijahis ijas lávejit maiddái árbevirolaš luođit illudahttit. Dán jagi dain vástidit sierra guovlluin boahtti luohtečeahpit gildinsápmelaš Semen Bolshunov, anáraš Petter Morottaja ja dovddus luohtedáiddár Ulla Pirttijärvi.
Festivála oktavuođas ordnejuvvo vuosttaš háve fanasmátki. Fanasmátkái galgá sierra oastit bileahta. Fanasmátkki musihkas vástida rápnásti Ailu Valle.
"Talent stage" lokte artisttaid, geat eai leat leamaš vel oidnosis
Dán háve prográmmii gullá maiddái dakkárge ođđa prográmmaoassi, mas ođđa, roahkadis musihkkárat besset čájehit dáidduideaset.
– Lávvardaga Talent stages leat moadde artistta, geat eai leat vel olbmuid dieđus ja eai leat leamaš vel dađi eanet oidnosis, de mii addit sidjiide saji ja olbmuide vejolašvuođa oaidnit sin, lohká Ahlakorpi.
Yle Sápmi lea Ijahis idja -festivála guhkesáigásaš ovttasbargoguoibmi.