Borgemánus Anára girkosiiddas dáhpáhuvva ja olu. Sullii 600 ássi Anára girkosiiddas ordnejit borgemánu 5.–7. beivviid Sámi girkobeivviid, maidda vurdet juoba 350–500 oassálasti.
Diet vahkkoloahppa leage juo oalle muddui dievva juohke Anára hotealla- ja orrunsadjefitnodagas.
Anárlaš Hotealla Kultahovi fitnodatdoalli Kaisu Nikula muitala, ahte dáhpáhusaid lassin sin hotealla lea dievva juohke vahkoloahpa.
– Sámi girkobeaivvit leat sirdásan juo guhkká ja dát vahkkoloahppa leige dievva mis juo mannan jagi. Dál leat buot vahkkoloahpat dievva, go turisttat johtet, muitala Nikula.
Dušše moadde guoros lanja
Yle Sápmi jearai Anára stuorimus orrunsajiin sin vejolašvuođas fállat idjadansajiid borgemánu stuorra dáhpáhusaid áigái.
Sámi girkobeivviid sihke Hotel Inaris, nuoraid ja luondoturismaguovddás Vasatokkas ja Hotealla Kultahovis leat buot orrunsajit dievva.
Dušše Wilderness hoteallas muitalit, ahte sis leat ain fállun moadde lanja vel dán vahkkolohppii.
Nubbi stuorra festiválavahkoloahppa lea vuordimis borgemánu 19.–20. beivviid, go eamiálbmogiid musihkkafestivála Ijahis Idja buktá vejolaččat duháhiid festiválagussiid Anára girkosiidii. Diibmá ovttabeaivasaš Ijahis Idja -festiválas gallededje oktiibuot 900 olbmo.
Ijahis Idja -vahkkoloahppas girkosiidda lahkosis gávdnojit ain muhtin hoteallalanjat, muhto buot hoteallat ávžžuhit doabmalit.
– Mis leat dušše lávvardahkii muhtin lanjat, lasiha Kaisu Nikula Anára Kultahovis.
Beaivvi ságaid ja Yle Ođđasiid Sámis sáhtát maid guldalit Yle Areenas.