Vuohču skuvlla šiljus dáhpáhuvvá dál, go Soađegilis sirdojuvvon modulaskuvllat ihte dán vahkus skuvlla šilljui. Huksenbargguid áigetávval lea goittotge maŋŋonan ja danin skuvlamánát ja beaiveruovttu mánát šaddet álggahit skuvlajagi sadjásaš visttiin.
Soađegili gieldda sadjásaš teknihkalaš jođiheaddji Ville Pyhäjärvi muitala, ahte áigetávval fanai, go eai ožžon lobi áiggil guovlodoaimmahagas fievrridit modulaskuvlavisttiid govdafievrrideapmin.
– Modulat galge boahtit juo 20. suoidnemánu, muhto dál dat fanai suoidnemánu lohppii. Leat goittotge bastán dahkat rievdadusaid modulaskuvllaide jo Soađegilis, muitala Pyhäjärvi.
Vuohču skuvllas leat burgimin dál vel lihkadansále vai besset hukset ođđa oasi vistái.
Modulaskuvlla ja boares lihkadansále gaskii šaddá nu gohčoduvvon goallossadji, masa huksejuvvo boradansále ja čoahkkinlatnja. Boares lihkadansále divodit ollásit ja dálloteknihkka ođasmahttojuvvo.
– Buot olggošráhkadusaid ođasmahttet. Ráhkadusaid, main lea asbeasta, váldit eret vai oažžut dorvvolaš ja dearvvaslaš sajiid. Ulbmilin lea, ahte mánát besset ođđa lanjaide golggotmánu loahpas, čilge Pyväjärvi.
Vánhen lohkan skuvlla dilis mediadieđuin
Vuohččulaš vánhen Eeva-Mari Äärelä oinnii bearjadaga iđđes gávppis finadettiin, ahte modulaskuvllat ledje ihtán skuvlla šilljui. Dat boktá ollu iešguđetlágan dovdduid.
– Gal mun livččen vuordán, ahte livčče dat min hoavddat vehá geargan smiehttat dán ođđasis, ovdal go livčče buktán dieid. Kánske ii dasto, miihan fertet birget daiguin, dadjá Äärelä.
Äärelä muitala, ahte vánhemiidda lei juo álggu rájes dieđus, ahte mánát eai beasa ođđa skuvlalanjaide dalle, go skuvla galggašii álgit. Äärelä gal eahpida, ahte doallágo dáláge áigetávval deaivása.
– Dat ii boađe dán jagi bealde leat duos skuvla mis ollenge, smiehtada Äärelä.
Soađegili čuvgehusjođiheaddji Ritva Ollila muitala, ahte skuvlamánát álggahit skuvlajagiset dáin sadjásaš visttiin, main sii ledje juo giđđat. Gielda áigu dieđihit Vuohču vánhemiidda áššis borgemánu álggus.
Eeva-Mari Äärelä lea behtton dasa, mo vánhemat leat gártan lohkat skuvlla dilis mediadieđuid vuođul, dan sajis ahte livčče ožžon dieđáhusaid Soađegili gielddas.
– Gal mii leat ožžon aviissas lohkat ja mun ieš, guhte lean beroštuvvan áššiin, lean riŋgen dohko virgeolbmuide ja iskan oažžut čielgasa dán áššis. Dieđiheapmi ii leat leamašan diekkár, man mii livččiimet sávván, oaidná Äärelä.
Sadjásaš teknihkalaš hoavda: "Mánáide šaddá golbma geardde eanet sadji"
Soađegili gieldda sadjásaš giddodathoavda Petri Sassali mieđihii suoidnemánus Ylei, ahte Vuohču skuvlaprošeavttas giksin leamašan hoahppu, eaige dan leat plánen albmaláhkai.
Maiddái gieldda sadjásaš teknihkalaš jođiheaddji Ville Pyhäjärvi oaidná, ahte váttisvuođat leat leamašan áigetávvala oasil. Olles proseassa vulggii johtui dán jagi álggus. Ulbmilin lei sirdit modulavisttiid vuođđooahpahusa várás, muhto fáhkkestaga modulaide ledje olu earáge doaimmat čujuhuvvon.
– Dasa ovttastahtte nu olu eará doaimmaid go vejolaš ja seamma oktavuhtii bođii maiddái árrabajásgeassin, muitala Pyhäjärvi.
– Modulaid oasil mis ii leat stuorra áigetávvaldeaddu, muhto boares vistti viiddidanoasis lea hoahppu ja golut lassánedje. Álggus mis ii lean dieđus, man olu rievdadusat šaddet burggekeahtes vistái nappo lihkadansále várás. Das šaddá áibbas ođđa siskkil, muitala Pyhäjärvi.
Pyhäjärvi oaidná goittotge, ahte ođđa modulaskuvllas šaddá buorre ja doaibmi čoavddus, vaikko skuvlaproseassa leage ožžon kritihka.
– Mu áddejumi mielde dát čoavddus lea doaimmalaččat buorre. Sámediggige lea cealkán áššis ja sin mielas buoret čoavddus šaddá dušše ođđa vistti huksemiin. Sii eai vuostálastan maidige.
Pyhäjärvi muitala, ahte sámegieláššit leat maiddái váldojuvvon bures vuhtii.
– Skuvllalaččaide šaddá mearkkašahtti mearri lasi sadji. Juoba golmmageardásaččat eanet, go maid girkosiidda skuvllas leat, dadjá Pyhäjärvi.
Beaivvi ságaid ja Yle Ođđasiid Sámis sáhtát maid guldalit Yle Areenas.