Yle Sápmi čuovui: Sámediggi mearridii bissehit duohtavuođa- ja soabadankommišuvnna barggu gaskaboddosaččat

Sámedikki dievasčoahkkin nogai diibmu 15.16.

Yle Sápmi giitá buohkaid, geat leat čuvvon čoahkkima dán artihkkala bokte.

Nuorgam sálloša mearrádusa

Anne Nuorgam atná mearrádusa hui váidalahttin. Son buktá ovdan, ahte Ohcejot leagis olbmot leat vuordán dan proseassa ja eallilan olbmot leat jo jurddašan, maid áiggošedje muitalit. Nuorgam guođđá áššis sierraoaivila.

Sámediggi mearridii: duohtavuođa- ja soabadankommišuvnna bargu bisána jahkái dahje jahkebeallái

Matti Aikio evttoha, ahte duohtavuođa- ja soabadankommišuvdna válddašii dál jahkebeales jahkái bistevaš bottu. Stivrra evttohusa mielde Sámediggi vállje dál ođđa komissára anárašgiela- ja davvisámegielajoavkkuide.

Matti Aikio evttohus vuittii.

Jienasteamis addojuvvojedje 19 jiena, main 9 jiena JAA ja 10 jiena II. Dat dárkkuha dan, ahte Sámediggi boahtá evttohit kommišuvnna barggu bisseheame gaskaboddosaččat.

Čoahkkin ii danin dál vállje ođđa komissáraid.

Nuorgam sáhttá oassálastit čuovvovaš ášši jienasteapmái

Jienaid rehkenasttit Magreta Sara ja Veikko Feodoroff nanneba jienasteami bohtosin JAA 8, II 6 ja guoros 4.

Jienasteami bohtosin dievasčoahkkin lea mearridan ahte Anne Nuorgam oažžu oassálastit čuovvovaš jienasteapmái das, joatkašuvvágo kommišuvdna Sámedikki stivrra evttohusa mielde.

Avaskari ja Kangasniemi guođđiba ain sierraoaivila. Sivvan lea dat, go Nuorgam lea evttohuvvon komissáran.

Sámediggi jienasta ođđasit Nuorgama easttalašvuođas

Sámedikki dievasčoahkkin jienasta ođđasit das, sáhttágo Anne Nuorgam oassálastit Matti Aikio evttohusa duohtavuođa- ja soabadankommišuvnna barggu gaskkaldahttimis meannudeapmái, vai leago son easttalaš.

Anne Nuorgam oassálastii eske jienasteapmái áššis, muhto dál ii oassálaste.

Ášši dárkilmahttojuvvo, vai čielggadit, sáhttágo Sámedikki čoahkkinortnega mielde ságadoalli gomihit eske dahkkon mearrádusa.

Láhkačálli Kalle Varis kommentere vel ášši. Sámedikki guoská iežas láhka, muhto dat ii leat nu viiddis ja ii vástit juohke gažaldahkii. Dalle fertege heivehit eará lágaid, dego hálddahuslága.

Go mearrideames lea šaddan feaila, galgá dál Varisa mielde mearridit áššis ođđasit.

Jienasteami boađus easttalašvuođas gomihuvvo – ságadoalli Juuso: “Ovddit jienasteapmi lei feaila”

Tuomas Aslak Juuso almmuha, ahte easkka jienasteapmi Anne Nuorgama easttalašvuođas gomihuvvo dasgo Nuorgam ieš oassálastii jienasteapmái, mii guoská su iežas.

Sámediggi jienasta áššis nuppe háve.

Čoahkkin joatkašuvvá nammačuorvumiin.

Čoahkkimis leat mielde Tuomas Aslak Juuso, Anni Koivisto, Leo Aikio, Juha-Petteri Alakorva, Anu Avaskari, Veikko Feodoroff, Inka Kangasniemi, Pigga Keskitalo, Kari Kyrö, Tauno Ljetoff, Asko Länsman, Ulla-Maarit Magga, Anne Nuorgam, Pirita Näkkäläjärvi, Magreta Sara ja Irja Seurujärvi-Kari.

Várrelahtuin čoahkkimis leat Teija Tamminen, Sámmol Lukkari ja Matti Aikio.

Dievasčoahkkimis fas boddu

Čoahkkin váldá 15 minuhta bottu. Bottu áigge čielggadit leigo easkka jienasteapmi lágalaš vai gártetgo jienastit ođđasit. Čoahkkin joatkašuvvá diibmu 14.40.

Sámediggi galggašii bottu maŋŋá jienastit stivrra evttohusa duohtavuođa- ja soabadankommišuvnna joatkkimis, ja guovtti ođđa komissára válljemis ja Matti Aikio evttohusa gaskalduhttit kommišuvnna barggu, gaskkas.

Avaskari, Kyrö ja Kangasniemi guđđet sierraoaivila. Sii fuobmášuhttet ahte Anne Nuorgam oassálastii jienasteapmái, mii guoskai su iežas.