Musihkkafestivála Ijahis ija nubbi beaivi lea álgán Anára márkanis. Yle Sápmi lea báikki alde maiddái odne lávvordaga čuovvumin festiváladovdduid festiválaguovllus.
– Speanta lea, muhto dat láve nohkat go vuosttaš nuohtta álgá, muitalii Erke Eriksen ovdal iežas ovdanbuktima.
Musihkka lea garrasut ja johtilut, trash metallange dan gohčodit. Eriksen láve čállit sámeáššiid ja hástalusaid birra.
– Mun láven váldit sámi váttisvuođaid, mat váttisvuođat mis leat kolonialisttalaš riikkain Norggas, Suomas, Ruoŧas ja Ruošas, mo mii leat gártán dáid vuostá doarrut.
Angelit-joavku ávvuda dál dán, go joavkku vuođđudeames lea gollán 40 jagi. Lávddi ala gorgŋot oappážiid Tuuni Partti ja Ursula Länsman lassin maid Ulla Pirttijärvi, guhte guhkes bottu maŋŋá searvá maid joavkku konsertii. Angelit lohpidit čuojahit ovddeš bivnnuhis šuoŋaid, maid sihkkarit máŋgasat muitet ja dovdet.
Festivála dáiddálaš jođiheaddji Anna Näkkäläjärvi-Länsman illuda, go festivála lea fas oažžun čoahkkái miellagiddevaš prográmmafálaldaga.
Yle Sápmi lea Ijahis idja -festivála ovttasbargoguoibmi.
Beaivvi ságaid ja Yle Ođđasiid Sámis sáhtát maid guldalit Yle Areenas.