Jagis 1819 riegádii Brännas gilis Máláges, Ruoŧa Västerbottenis Stina Larsdotter, guhte nuorran dušše stuorui ja stuorui. Larsdottera dovdet maiddái Stuor-Stinan: juo mánnán son lei čalbmáičuohcci, go son lei issoras guhkki.
Dušše 18-jahkásažžan Larsdotter jođii Stockholbmii, gos olbmot besse su oaidnit čájáhusgálvun ja deaivvai maiddái Ruoŧa gonagasa. Ruoŧas son šattai dovddusin namain Långa-lappflickan ja jođii iešguđetlágan čájáhusain nu Ruoŧas ja olgoriikkain. Larsdatter lei badjel guokte mehtera guhkki ja dutkit čájehedje sutnje stuorra beroštumi juo ovdalgo jámii.
Jagi jápmima maŋŋá Larsdottera dákteriggi roggojuvvui su hávddis dutkamušaid várás. Guhká gádde, ahte su dákterikkit dušše stuorra buollimis Stockholmma Karolinalaš instituhtas 1800-logu loahpa geažis. Instituhta dutkit čogge dalle maiddái eará sámiid bázahusaid.
Dál Karolinalaš instituhta lea gávdnan su bázahusaid. Dat lei stuorra ođas Larsdottera ruovttuguovllu sámiide.
– Mun in jáhkkán, ahte dat lei duohta. Mii leat álot gullan, ahte su bázahusat bulle ja jávke stuorrabuollimis 1800-logu loahpas. Nuba dat lei šohkka, illu ja gatnjalat golge, go gullen, ahte su bázahusat leat gávdnon, muitala Máláge sámesearvvi ságadoalli Eva Stenberg Artursson.
Sámesearvvis oidnet, ahte dál leage áigi máhcáhit Stuor-Stina bázahusaid ruoktot.
– Dál son galgá boahtit ruoktot. Maid son doppe Karolinalaš instituhtas, su ruoktu lea dáppe. Son lea sámenisson Málágis, son galgá beassat ruoktot iežas váhnemiid ja oappáid lusa, oaidná Stenberg Artursson.
Áššis muitala SR & SVT Sápmi.
Beaivvi ságaid ja Yle Ođđasiid Sámis sáhtát maid guldalit Yle Areenas.