Itävaltaast, Nuorttâvääldist, Wienist, lii taan ohhoost joođoost fenno-ugrilâš konferens, já koskoho lii sämikielâi peivi. Jyehi viiđâd ive uárnejuvvoo konferens mottoom ollâopâttuvvâst, kuus čokkâneh suomâugrâlii kielâi äššitobdeeh.
Tábáhtume pištá ubâ oho. Jukka Mettovaara Oulu ollâopâttuv Giellagas-instituutist lii tääl nube keerdi mieldi. Vuosmuu keerdi sun lai uáppen mieldi já tábáhtume lâi talle Suomâst já Oulust. Taan keerdi sust lii sahâvuáru, mast sun muštâl anarâškielâ fonologiast.
– Mun muštâlâm anarâškielâ koskâvokalist, â-puustavist já tast, maht ulmuuh eteh tom taan ääigi, muštâl Mettovaara.
Sämikielâpeeivi Mettovaara lasseen sahâvuáru anarâškielâst tuálih Marja-Liisa Olthuis, Annika Pasanen já Tuomas Koukkari.
Meid eres sämikielah láá mieldi, ovdâmerkkân saahâ lii nuorttâlâškielâ ruoššâkielâ lovnâsaanijn já leuddijn.
Tábáhtume lii tergâd kielâtotkeid. Eidu taat fenno-ugrilii konferens lii taan syergi stuárráámus. Taan ive hyenes äšši lii, et Ruoššâenâmist uásálisteeh láá uccáá, maailm tile tet.
– Taat lii ovdil lamaš hirmâd šiev saje, kost taan syergi ulmuuh pirrâ maailm láá puáttám oohtân, iätá Mettovaara.
Mettovaara lii tääl vuosmuu keerdi Wienist já lijkkoo kuávlust. Vástuppeeivi eehidpeeivi konferens virgálávt nohá, mut lávurduv sij val uápásmuveh vijnijd, ko Nuorttâväldi lii tobdos vijnij pyevtitteijee-eennâm.
Kuldâl lase Anarâš saavâid tääbbin.