Máŋggaid čuđiid johkaskálžžu binnabánna suovssaid bidjet fas čievralihtis Lohttujoga bodnái Nuorta-Anáris. Suovssaid bukte maiddái diibmá Lohttujohkii, ja dat birgejedje dálvvi badjel, muitala dutkidoavttir Jouni Salonen.
Vuosttas jagiid suovssaid dollet gássas, muhto boahttevuođas dat besset eret kássas jogabodnái.
– Dás ovddosguvlui suovssaid stuorruma čuovvut moadde jagi. Dasto go dat leat moatte jagi geažes doaivvu mielde sturron, de daid luoitit eret kássain. Dasto dat ellet friidjavuođas, luonddudilis iežaset ruoktojogas.
Lohttujoga johkaskálžžut eai leat njovggiidan guhkes áigái, vaikko dat leamaš ráfáidahttojuvvon measta 70 jagi. Moadde jagi dassái čogge johkaskálžžuid ja sáddejedje daid Mátta-Supmii dutkanstašuvdnii vai njovggiidit. Mannan geasi daid ovccimánnosaš suovssáid bukte fas Lohttujohkii.
– Dákkár vuohki lea Suomas ođđa. Álggus galgá dutkat ja čielggadit áššiid ja dasto ovdánahttit ealáskahttinvugiid buoremus lági mielde, muitala nákkosgirjedutki Sabrina Nykänen.
Dál lea dušše vuordit ja jáhkkit, ahte johkaskálžžuid suovssat sturrot, cevzet moadde čuohte jagi Lohttujoga botnis ja vel muhtumin njovggiidit.
Johkaskálžonáli ealáskahttin lea áddjás bargu ja dán Lohttujogas váilu okta, man johkaskálžu dárbbaša.
– Lunddolaš njovggiideapmi ii leat vejolaš luosa váiluma dihte. Dál mis leat goit unna johkaskálžžut dáppe, ja ná oažžut 200 jagi lassiáiggi lunddolaš njovggiideapmái, dadjá dutkidoavttir Jouni Salonen.
Beaivvi ságaid ja Yle Ođđasiid Sámis sáhtát maid guldalit Yle Areenas.
2.9.2022 dii. 15.52 Jouni Salonen ja Sabrina Nykänen namat divvojuvvon.
Loga maid: