Yle sámegielat mánáidprográmma Unna Junná máhccá tv:i vuossárgga 5.9. Yle TV2:žis diibmu 8.30. Dán čavčča tv:s čájehuvvojit Unna Junná boares oasit jagis 2016.
Unna Junnás oidnojit dán čavčča musihkka- ja stoahkanbottut golmma sámegillii. Stoahkanbottut sisttisdollet sihke leu’dd, livđe, luođi ja lávlagiid.
– Čavčča prográmmat leat dakkárat, maid olbmot leat mis olu sávvan. Prográmmat leat Yle Areenas oaidninláhkái álo ovtta mánotbaji, muitala Yle sámegielat mánáidsisdoaluid buvttadeaddji Heli Huovinen.
Unna Junnás oaidnit maid eará miellagiddevaš ja gelddolaš bottuid, nugomat háhppilis Kumbepasi-beatnaga fearániid. Mielde lea maid Unna Junná ja son oahpásmuvvá dán háve rásiide.
Huovinen muittuha, ahte vaikko tv-sátta boahtáge beare oktii vahkus, liikká sisdoallu lea geahččanláhkai Yle Areenas vaikko man olu. Lasi boahtá jeavddalaččat.
– Mii almmustahttit prográmmaráidduid maid Areenas oppa áigge. Ovdamearkka dihte jagi loahppabealde almmustuvvá Čeavetjávrris govvejuvvon musearáidu Tää'l da tuu'l ja moaddelot ođđa animašuvnna, Huovinen dadjá.
Sámegielat mánáidsisdoallu gávdno Yle Mánáid Areenas.