Skállováris ávvudedje 30-jahkásaš gárdeskuvlla – "Mii fuolahit stobus vai boahttevaš buolvvatge sáhttet vázzit skuvlla dáppe"

Ohcejoga Skállovári bigálusbáikkis ávvudedje mannan vahkuloahpas gárdeskuvlla 30 jagi doaluid. Gostege eará sajis Suomas ii bigálusbáikkis leat iežas skuvlastohpu, go Gálddoaivvi bálgosa gárdde luhtte Skállováris.

Gárdeskuvla lea dahkan vejolažžan dan, ahte mánát besset vázzit skuvlla ja seammás maid oassálastit bigálastimiidda ovttas iežaset bearrašiiguin.

Njuorggánlaš Áslat-Jon Länsman lea mánnávuođastis vázzán Skállováris skuvlla gárddástallamiid áigge, ja dál seamma skuvlabálgái lávke maid su boarraset gánda.

– Dáthan čátná olbmuid eanet oktii, ja de bajásšaddat vel eanet sámebirrasis ja sámegielat birrasii ja fidnet unna gándda ja nieidda rájes nana iešdovddu sámekultuvrras, ja dat doalvu du de guhkás, dadjá Länsman.

Aslat Jon Länsman váccii gárdeskuvlla ja maiddái su mánáguoktá beassába dohko

Raba gova stuorábun

Bohccot ja vánhemat lahka

Ovdal skuvlastobu Gálddoaivvi mánát vázze skuvlla ássanvovnnas dahje njuovahaga gievkkanis. Nastola Rotary-joavku háilidiige skeŋket gárdeskuvlastobu, vai boazobearrašiid mánát sáhttet vázzit vánhemiid luhtte skuvlla bigálusaid ja boazobargguid áigge.

Olles 30 jagi lea Rotary-joavku fuolahan ja doallan báikki ortnegis ovttas Guovssu-ovttastusain. Mannan giđa báikki fuolahan ovddasvástádus goit sirdásii Ohcejoga gildii, go skuvlastobu skeŋkejeaddjiin eai leat šat návccat bajásdoallat stobu.

Njuorggánlaš Sivi Jomppanen-Länsman sávvá, ahte skuvlastohpu bissu ceaggut vel čuovvovaš 30 jagi.

– Mii ain fuolahit skuvlastobus ja das, ahte munno mánát ja dás ovddusguvlui boahttevaš buolvvat sáhttet vázzit skuvlla dáppe Skállováris, dadjá Jomppanen-Länsman.

Inger Länsman muitala, mo skuvlastohpu šattai Skállovári bigálusbáikái

Raba gova stuorábun

Mánáide lea dehálaš, ahte besset skuvlla váccidettiin maid searvat boazobargguide ja leat mielde bigálusain ovttas bearrašiin. Njuorggánlaš Anni-Siviä Länsman mielas gárdeskuvllas buoremus lea dat, ahte skuvlabeaivvit eai leat nu guhkkit ja vánhemat leat lahka.

– Dat lea somá, go dáppe sáhttá leat hui ollu ja dasto skihpárat. Jus leamašan fuonesbeaivi, nu skihpárat leat álo duinna dáppe. Dasto beaivi lea ollu buoret, go skihpárat leat dáppe, dadjá Anni-Siviä Länsman.

Anni-Siviä Länsman liiko gazzat oahpu Skállovári gárddeskuvllas

Beaivvi ságaid ja Yle Ođđasiid Sámis sáhtát maid guldalit Yle Areenas.