Suoma nuortarájá alde Rádje-Jovssehis johtolat leamašan dán vahkus uhccán, nu mo juo lea dán máilmmidilis šaddan dábálažžan.
Rádjejohtolaga árvalit gal Suoma nuortarájá alde lassánit dál, go Polska ja Baltia riikkat giddejedje rájáideaset ruošša turisttain soađi geažil. Davvin dat ii liikká vuhtto.
Suopma lea dál áidna fiesttarriika, mii luoitá riikkii Ruošša beal olbmuid turistavisumiin. Dát ášši leage boktán ollu ságastallama maŋimuš beivviid.
Avvila márkan lea sullii viđa miilla duohken Ruošša rájá rádjerasttildanbáikkis Rádje-Jovssehis. Dat lea lagamuš čoahkkebáiki Anára gielddas, gos ruoššat lávejit gávppašit, eandalit ovdal pandemiija.
Dál Ruošša beal olbmot dihttojit hui uhccán, vaikko koronaráddjehusaid leatge ložžen. Johtin ii leat aŋkke vuos olus lassánan, muitala gávpehoavda Henry Kesti Avvilis.
– Ráddjehusaid ložžema maŋŋá ruošša turisttat leat ain uhccán, moaddelot áššehasa vahkkolohppii. Eai leat nu olu go dalle ovdalašáiggiid, dadjá Kesti.
Son muitala, ahte ovdal koronaáiggi ruoššat sáhtte leat juoba moaddelot proseantta buot áššehasain. Alimus áiggiid lávvardagaid lávejedje čuođit ruoššat finadit gávppašeamen Avvilis.
– Ruoššaid gávppašanmátkkiin lei stuorra váikkuhus gálvvuid johtui, ja dat buvttii mielddis sisaboađu midjiide ja olles gillái, Kesti lohká.
Geassit koronaráddjehusaid ložžejedje suoidnemánu beallemuttus, muhto johtolat Ruošša rájá alde ii leat lassánan seamma dássái, maid dat lei ovdal koronapandemiija. Ovdal koronapandemiija Suoma ja Ruošša rájá Rádje-Jovssehis rasttildedje 4 000 olbmo vahkkosaččat.
Dál rádjerasttildeamit leat sullii 800 juohke vahkus, muitala rádjegozihanoffiseara Frans Hietanen Rádje-Jovsseha rádjerasttildanbáikkis. Hietanen ii jáhke johtolaga lassánit goittot Polska ja Baltia riikkaid johtinráddjehusaid dihte.
Beaivvi ságaid ja Yle Ođđasiid Sámis sáhtát maid guldalit Yle Areenas.