Ohcejoga gielddas geahččalit gávdnat čovdosa mo joatkit giellaguovddásdoaimma. Deanuleagis sámástit -prošeakta lea nohkamin ja gielda ferte dál gávdnat earet eará ruhtadeami giellaguovddáža boahtteáiggi várás.
Doaimma joatkimis leamaš dál vehá hástalusat, muitala Ohcejotnjálmmi skuvlla ja sámelogahaga rektor Laura Arola. Son barggai oval Deanuleagis sámástit -prošeavttas.
– Buot ii leat áibbas mannan nugo lei plána, ahte giellaguovddážis lea okta bargi ja son dasto álgá doaimmaid lágidit ja ohcat lasseruhtadeapmi. Mun ledjen dat bargi, gii lei válljejuvvon máŋggagielatvuođaáššedovdin, muhto lean dál šaddan rektorin. Unna gielddas ferte smiehttat dan, gos dárbu lea stuorámus.
Arola lea rektora barggu lassin bargan giellaguovddáža koordinerenbarggu ja muhtin doaimmat leat beassan johtui.
– Mis leat álgán giellakurssat máŋgga dásis, dasto leat soahpan astoáiggedoaimmain ja muhtin dáhpáhusatge leat boahtimin, logahallá Arola.
Son dadjá, ahte gielddas leamašan plánat das, ahte makkár resurssaid lea vejolaš gávdnat gielddaguovddáža ovddideapmái, muhto dat leat ain oassái gaskan.
Gielddas leat dál kárten iešguđetlágan ruhtagálduid, gos ohcagoahtit ruhtadeami giellaguovddásdoaimma várás.
Deanuleagis sámástit -prošeakta nohká 30.9.2022. Prošeavtta oktan ulbmilin lei Ohcejoga giellaguovddáža vuođđudeapmi.
Yle Ođđasiid Sámis ja Beaivvi ságaid sáhtát maid guldalit Yle Areenas.