Historihkkár Aage Solbakk lea ožžon dán jagáš giellaloktenbálkkašumi, muitala NRK Sápmi. Bálkkašumi geigiiga sutnje sotnabeaivve 24.10. Sámi giellavahku rahpama oktavuođas Norgga gonagas Harald ja Norgga sámediggepresideanta Silje Karine Muotka.
– Dat lei munnje illuboddu, muitala Solbakk vuosttas dovdduin NRK Sápmái.
Diehtu bálkkašumis bođii vuorddekeahttá moadde vahku dassá, muhto dat movttiidahtii Solbakk sakka.
– Ledjen váhá illávejiid, golgodávda lei, muhto go dan dieđu ožžon, mun seammás dearvvasmuvven, joatká Solbakk.
Datge lei illuboddu Solbakkii, go beasai vuosttas geardde eallimis dearvvahit Norgga gonagas Haralda.
Lea hálidan muitalit sámi ja maid luossabivddu historjjá
Solbakk lea guhká bargan sámegiela ovdánahttimiin sihke árbevirolaš bargguid ovddideamis ja fágagirjjiid almmuhemiin. Son lea vuoruhan sámi servodahkii juohkit fágalaš dieđuid sámegillii.
Son lea leamaš mielde almmuheamen sullii 200 girjji ja dieđalaš artihkkala, eanaš dain davvisámegillii.
– Ollu lea illudahttán erenomážit ahte lean beassan čállit historjjá oahppogirjjiid ja deattuhit sámi historjjá, muitala Solbakk.
Solbakk lea olu hálidan muitalit maid Deanu ja luossabivddu historjjás.
– Mii, geat leat bajásšaddan erenomáš Deatnogáttis, de miihan birra jagi hállat luosa birra. Diehan lea min eallin, diehan lea min identitehta, loahpaha Solbakk.
Yle Ođđasiid Sámis ja Beaivvi ságaid sáhtát maid guldalit Yle Areenas.