Aanaar markkânist ij sämikielâ ennuv oinuu já páihálijn kaavpijn meid uccáá. Säämi máttááttâskuávdáá sämikielâi uáppeeh halijdii, ete kaavpijn oinuuččij sämikielâ eenâb. Kielâoho kunnen sij rahtii viđâlov tävirân nommâkoolbâid kuulmâ sämikielân.
Äššigâssáid taat lâi uđđâ äšši. Aanaarliih Hilma Mustonen já Elli Maaret Helander movtáskáin, ko oinijn jieijâs eenikielân täävvir noomâ. Siämmást peesâi viärdádâllâđ, mii sääni lii eres sämikielân. Juávhust lijjii meid sunnui omâs säänih.
– Mietâ, jiem lah kuássin kuullâmgin. Tasthân mij-uv pyehtip oppâđ siämmást uđđâ saanijd, illood Helander.
Sunnuu mielâst sämikielâ kolgâččij luándulávt oinuđ ja kulluđ Aanaar markkânist. Nissoonkuáhtá mielâstličij hitruu, jis puávtáččii kävppijâssáin sárnuđ sämikielâ, veikkâ onnáá peeivi harvii taarbâš kävppijâs iššeen.
– Tot kolgâččij kuullâđ luándulávt Aanaar kavppijd, ete kiinii tobbeen sárnuččii sämikielâ, aaibâs jo hitruuvuođâ tiet, iätá Mustonen.
Kielâuáppeeh halijdii sämikielâid uáinusân käävpist
Puoh aalgij tast, ko anarâškielâ lohhee Zuzana Skalova škovlâpargon lâi tutkâđ, ete maggaar lii Aanaar markkân kielâpiirâs. Tast huámmášij, ete ovdâmerkkân Aanaar kaavpijn iä ennuv sämikielah oinuu.
Tondiet Säämi máttááttâskuávdáá sämikielâi lohheeh algii oovtâst rähtiđ tävirijd nommâkoolbâid puoh kuulmâ sämikielân. Tääl Aanaar Sale-käävpist kávnojeh-uv viđâlov täävvir nommâ kuulmâ sämikielân.
– Muu mielâst kolgâččij leđe jiešmeidlist čielgâs, ete Anarist kaavpijn já markkânist uáinoo sämikielâ, iätá Skalova.
Sale-käävpi kävppijâs Henry Kesti movtáskij ääšist já mielâstis adelij love pieijâđ koolbâid ilddeid. Sii käävpist ij ennuv oinuu sämikielâ, ko tom lii uáli vaigâd olášuttiđ. Jis puoh tävirij noomâid kolgâččij merkkiđ kuulmâ sämikielân, te tot ličij onnáá peeivi tekniik iähtun hástu. Mut sämikielâi kuullum kal ličij älkkee lasettiđ.
– Puávtáččijm kulluuttâsâid toohâđ sämikielân, ete tääl forgâ kävppi mana kiddâ já meid máinum, smiättá Kesti.
Kävppijâs lijkkui uáppei jurdust nuuvt, ete adelij skeŋkkân täävvirpakkeet. Pakkeet vuárbuh kielâoho loopâst toi kooskâst, kiäh láá kuáđđám macâttâs nommâkoolbâin. Suu mielâst koolbah uážuččii leđe käävpist kuhheeb-uv ääigi ko tuše kielâoho.
Kuldâl lase Anarâš saavâid tääbbin.