Aila-duo: Láim vyeitteeh jo ton-uv tiet, ete láim finaalist

Heli Aikio já Jessika Lampi Aila-duo vuoitij pessijášlávurduv Sámi Grand Prix -lávlumuási pittáin Naharij kandâ.

Aikio lâi kišto maŋa uáli ilolâš.

– Láá kale tuođâi šiev tobdoh. Muoi láim vyeitteeh jo ton-uv tiet, ete láim finaalist. Mut tomhân tot táárgut, ete muoi älgeen hárjuttâllâđ puáttee ihán, ko vyeittee tuálá konsert tääbbin puáttee ive. Must kal noheh tääl säänih, Aikio iätá.

"Piergim ij lah kielâst kiddâ"

Sun lâi tuđâvâš meid toos, ete anarâškieláin-uv puáhtá piergiđ taggaar kištoost ko Sámi Grand Prix.

– Tot lâi kale tuođâi suotâs, ete tot ij lah kielâst kiddâ. Anarâškielân-uv piergee.

Meid Jessika Lampi lâi uáli ilolâš ton maŋa ko puátuseh pottii.

– Vissâsávt tot lâi stuorrâ illâttâs munnui kuohtuid. Tääbbin kuittâg puohah lijjii onne nuuvt pyereh. Tääl kalga hárjuttâlškyettiđ korrâsávt puáttee ive várás, sun povvâst.

Anarâšâid ovdâstij meid Amoc, kii eelij ráppáámin kišto juoigâm- já lávlumuási kooskâst. Suu jurduid kištopeeivist puáhtá kuullâđ taan oho Anarâš saavâin.