Riddu Riđđu-festivaal ive nuorâ taaiđâr, maadâsämmilâš Marja Helena Fjellheim Mortensson juoigâi ulmuid moonnâm oho tuorâstuv Riddu Riđđu festivaalist Taažâst. Fjellheim lii ilolâš ko peesâi čäittiđ jieijâs mučis kielâ já kulttuur festivaalist.
– Lii suotâs leđe ive nuorâ taiđârin ko piäsá čäittiđ jieijâs kulttuur já kielâ, muštâl Fjellheim Mortensson.
Tuđâvâš ko uccâ sämikielah-uv láá uáinusist
Marja Helena lii tuđâvâš toos, ete Riddu Riđđu-festivaalist láá fáárust uccâ sämikielah tego maadâsämikiela já kildinsämikielâ. Fjellheim Mortensson iätá, ete vâik puoh ulmuuh iä veldihánnáá ibbeerd suu kielâ, te puohah pyehtih kuittâg iberdiđ suu muusik, ko musiikist lii jieijâs kielâ. Fjellheim Mortensson lávlu já juáigá maadâsämikielân, mon sárnuh tuš muáddi čyeđe olmožid Ruotâ- já Taažâ pele Säämist.
Marja Helena Fjellheim Mortenssonist ij lah val almostum skiäru, mutâ sun lii rähtimin uđđâ muusik.