Vuoigatvuohtaministtar Anna-Maja Henriksson (ráb) geassá sámediggeláhkaevttohusa eret rikkabeivviin. Son muitalii áššis maŋŋebárgga eahketbeaivve moadde diimmu dan maŋŋá, go riikkabeaivvit ledje jienastan, ahte dat hálidit seailluhit dálá sápmelašmeroštallama.
Henriksson lei eahketbeaivve ain hui behtton.
– Mun ferten geassit olles láhkaevttohusa ruovttoluotta.
– Lean hui behtton dasa, ahte dat mii ráđđehusbellodagaiguin lei sohppojuvvon ovttas sámedikkiin, ii doallan. Dát lea hui váidalahtti ja vearrámus mii leat dán ráđđehussii dáhpáhuvvan.
"Lean čađa váiban dainna áššiin"
Anna-Maja Henriksson dadjá, ahte son lea morašlaš das, ahte guhkes láhkaválmmaštallan manai duššás.
– Mii leat issorasat bargan dán ovdii ja dieđusge lea hui morašlaš dovdu. Muhto dát lea roavvamus ovdamearka das, makkár politihkka sáhttá leat. Dát lea hui duođalaš dilli Supmii. Mus alddán eai leat šat navccat bargat dainna áššiin, lean čađa váiban.
– Váidalahtti eanaš riikkabeaiáirasiin oidne, ahte evttohuvvon meroštallan vealahivčče, vaikke dashan das ii leat gažaldat. Mii fertet gudnejahttit sámiid ja sin mearridanválddi ja das eat dál váidalahtti lihkostuvvan.
ILO:s vel doaivva
ILO 169 -soahpamuša ovdáneamis ii vel golmma sulaid eahketbeaivve lean diehtu.
– ILO-soahpamuša dáfus ášši lea ain rabas. Opposišuvdna lea dahkan evttohusa das, ahte ILO-soahpamuša galggašii hilgut.
– Ieš oainnášin goittotge, ahte das livčče lasseárvu maid sámiide ja aŋkke vel doalan gitta das, ahte doalvut ILO loahpa rádjai, dat livčče stuorra ášši Supmii ja sámiide, Henriksson loahpaha.