Govvadáiddár Outi Pieskii lea mieđihuvvon Suoma dáiddaakademiija bálkkašupmi. Bálkkašupmi geigejuvvo Pieskii odne Espoos, modearna dáidaga musea EMMAs.
Movttegis Pieskii bálkkašupmi lea stuorra gudni.
– Oi, dat gal lei nu somás ođas! Lea dieđusge hui stuorra gudni oažžut okta Suoma stuoramus dáiddabálkkašumi, dat dovdu lei dieđusge fiinnis, illuda Pieski.
Pieski dáidaga earenoamašvuohta, áidnalunddotvuohta ja áigeguovdilis stiila ledje mearkkašahtti sivat Pieski válljejupmái.
– Oainnán maiddái, ahte sii leat háliidan loktit dan sámi visualalaš kultuvra oidnosii dán bálkkašumi oktavuođas, lohká Pieski.
Privahttačájáhus ja ruhtabálkkašupmi
Bálkkašupmi lea 25 000 euro sturrosaš. Dan lassin bálkkašupmi sisttisdoallá maiddái privahttačájáhusa modearna dáidaga musea EMMAs. Pieski čájáhus boahtá EMMAi boahtte jagi bealde.
– Bálkkašupmái gullo, ahte sáhttá doallat stuorra čájáhusa dáppe EMMA-museas boahtte jagi, ahte dát dieđusge lea hui gelddolaš ja fiinná dilálašvuohta ja ahte beasan dasto čájehit muhtun dakkár stuorra installašuvnnaid doppe maid, Pieski muitala.
Bálkkašupmi juhkojuvvo juohke nubbi jagi, dál goalmmát háve. Pieski lassin bálkkašupmái leigga evttohassan dáiddárat Jani Ruscica ja Emma Rönnholm.
Sámi duodjeárbevieru ivnnit, hámit ja vuogit
Dáiddaakademiijas muitalit, man fiidnát Pieski muitala áššiin dáidaga bokte, loktá bajás unnitlogukultuvrra dovdduid sámi duodjeárbevirrui láktaseaddji ivnniiguin, hámiiguin ja vugiiguin leaikkastemiin. Pieski dáidagis oidnojit maid čujuheamit davviguovllu čuvgii ja eatnamiidda.
Bálkkašupmelávdegotti mielde Pieskis leatge earenoamaš buorit vejolašvuođat buktit Espoo modearna dáidaga museai áidnalunddot čájáhusa, mii bovde olbmuid bálkestahttit su hábmen iešguđetlágan máilbmái.
Dáiddár bargá stuorra installašuvnnaid, muhto maid málagovaid. Su dujiid lea leamaš earret eará Lux Helsinki -čájáhusas ođđajagimánus sihke dán olles jagi Londonis, Southbank Centeris “Nordic Matters” -nammasaš čájáhusas.
Suoma dáiddaakademiija bálkkašupmelávdegoddái gullojedje dáiddaakademiija ságadoali, dáiddár Antti Linnovaara lassin EMMA museahoavda Pilvi Kalhama, govvadáiddár Anitta Ruotsalainen ja Lappi universitehta rektor Mauri Ylä-Kotola.