Ohcejoga searvegoddi válljii sadjášas girkohearrá virgái nissonolbmo mannán giđđadálvve. Stuorra girjjis golmma sajis čielgasit daddjojuvvo, ahte nissonolmmoš galgá jaskkodit searvegottis. Dan dihte searvegotti girkoverdde ja luhkkár Janne Aikio guđii iežas barggu. Son ii hálit nissonbáhpain doallat ipmilbálvalusa, dasgo son čuovvu biippala sáni.
– Na go lea kristtalaš, de fertehan dat luohttit Ipmila ala, ahte jus bálkestá iežas olggobeallai dietnasis, áigáiboahtu lea vára vuolde, de munhan ferten bargat dan maid mun oahpahan, oskut Ipmilii, addit Ipmil gihtii dáid áššiid, lohká Aikio.
Aikio gearggai leat lágabui 30 jagi Ohcejoga searvegotti girkoverdden ja luhkkárin. Son liikui barggustis, muhto sutnje beali válljen lea leamašan guhká čielggas.
– Mun leamaš das rabas ja rehálaš, ahte mun in čiegadan iežan oainnu ja oskku dán áššis.
"Dás eai leat ovdal ságastallan Ohcejogas"
Ohcejoga dálá sadjášas girkohearrá Päivi Aikasalo maid guđii fásta barggus dieđamáilmmis go oaččui gohččuma. Son vulggii lohkat báhppan ja lea bargan báhppan máŋgga guovllus miehtá Suoma.
Mannán giđa son álggahii barggusttis Ohcejogas. Son atná iežas barggu dehálažžan.
– Mun lean ilus das, ahte lean báhppa, vaikko muhtimiid mielas dat ii leat vuogas, ahte nissonolmmoš lea báhppan.
– Mun lean goittotge dál iežan gohččunbarggus, dat lea munnje dehálaš bargu, lean gávdnan iežan báikki ja jurddašan, ahte go mun lean dál Ohcejogas barggus, dat lea munnje dehálaš bargu.
Aikasalo goittotge ádde dan, manin soaitá leat váttis dohkkehit nissonbáhpaid. Danin su mielas leage dehálaš ságastallat dan áššis searvegottiin.
– Olbmot sáhttet bargat nu, mo ieža hálidit. Muhto mun jurddašan maiddái nu, ahte dan ášši birra ii leat ovdal leamašan sáhka Ohcejogas, de dál dan birra ferte ságastallat, oaivvilda Päivi Aikasalo.
"Girkus buohkat leat ovttaveardásaččat"
Oulu bismágotti duopmokapihttala bismá Samuel Salmi mielas Janne Aikio mearrádus lea váivi.
– Báhpaid oasil lea čielgasit daddjon, ahte dat guhte ii ovttasbargga ovttaveardásaččat almmáiolbmuiguin ja nissonolbmuiguin, de sus ii leat dasji min girku virggálaš doaimmain.
Bismá Salmi deattuha, ahte girkus nissonolbmot ja almmáiolbmot leat ovttaveardásačča nu searvegotti lahttun go maiddái searvegotti virggiin. Biippalis lea bismá mielde daddjon dásseárvvus.
– Jus Biippalii čujuhat, de ferte muitit maiddái dan, ahte ieš apostal Paulus oahpaha dan, ahte Kristusis ii leat juvddálaš, ii greihkalaš, ii almmáiolmmoš iige nissonolmmoš, ii šlávva iige friddjaolbmot, nu ahte gal doppe dat dásseárvvu jurdda lea leahkimin dan bálddas, masa Aikio čujuha.
– Deháleamos lea dál dat, ahte girku lea ieš dahkan mearrádusa, ahte virggit girkus gullet nissonolbmuide ja almmáiolbmuide. Makkárge spiehkastagaid ii sáhte bargat iige diktit.
Bismá Samuel Salmi dadjá, ahte nissonolmmoš sáhttá doaibmat girkus áibbas seammaláhkái go almmáiolmmošge.
– Nissonolmmoš sáhttá doaibmat áibbas ovttaveardásaččat, almmá mangelágan ovdagáttuid. Almmáiolmmoš ja nissonolmmoš leat áibbas ovttaveardásaččat girkovirggi ektui.
Sutnje nissonolmmoš gal dohkke
Ohcejogas nissonbáhppa lea goit juo ovddežis oahpis. Guovllu iežas nisu, gáregasnjárgalaš Erva Niittyvuopio viháhuvvui báhppan badjel 10 jagi dassá. Son leage rahpan máŋga bálgá.
Ohcejohkalaš Jouni Helandera mielas searvegotti njunnoša bargu heive maid nissonolbmui.
– Go muhtimat moitet, ahte ii nissonolmmoš báhppan, de mun gal in jáhke sin. Gal nisson maid dohkke sihkkarit báhppan, ja Ervahan maid lea báhppa, letne suinnage háleštan muhtumin, muitala Helander.
Guldal Janne Aikio jearahallama Yle Areenas dáppe ja Päivi Aikasalo jearahallama fas dáppe. Bismá Samuel Salmi jearahallama sáhttá guldalit dáppe.
Beaiváduvvon 4.9.2017 dmu 14.35: lasihuvvon Yle ođđasiid Areena-liŋka ja radiojearahallamiid Areena-liŋkkat
Beaiváduvvon 4.9.2017 dmu 15.01: Lasihuvvon bismá Samuel Salmi kommeanttat ja Areena-liŋka radiojearahallamiid