Badjel 560 máná leat odne gaskavahku ávvudeamen stáhtaministtar Sanna Marin iehčanasvuođabeaidoaluin.
Helssega guvlui leaba vuolgán iđđes árrat maiddái gáregasnjárgalaš Vanessa Niittyvuopio ja Romeo Halonen oahpaheaddjiineaskka. Soai guktot leaba 10-jahkásaččat.
– Vuorddán erenoamážit stáhtaministara deaivvadeami, ahte dat gal lea oalle gelddolaš, muitala Romeo Halonen.
Vanessa Niittyvuopio ii lean gal sihkkar, maid áiggui muitalit dearvvahettiin ministariid. Son leage gártan olu smiehttat maid dadjá, go beassá buorástahttit stáhtaministara.
Máná guoktá leaba vuordán mátkki juo čakčamánu rájes.
– Lean smiehttan, ahte goasson dat lea ja vehá gealdagasas leamašan, Halonen čilgestii moadde beaivve dassái.
Guhkesmátkálaččaide šaddá measta hoahppu gárvodit
Vanessa Niittyvuopio muitala, ahte sis šattai measta hoahppu čiŋađit doaluide, go ollijedje Helssegii.
– Mis ii lean vissa go 5 minuvtta áigi gárvodastit gávttiide ovdal go galggaimet ollet hoteallas deike.
Romeo Halonen muitala, ahte ii leat vel váiban, vaikko lea iđit rájes leamašan jođus.
– Lean ainge gealdagasas vuordimin ministariid buorástahttima. In leat ráhkkanan muitalit maidige, iihan dan dieđe vuos maid sii jerret, árvala Halonen.
Stáhtaministtar Marina ja eará ministaraid joavdan doaluide lea maŋŋonan iešguđetlágan hoahpuid dihte. Viimmat sullii diibmu 15.15 ministarat jovde báikki ala ja álge buorástahttit mánáid.
Mánát besset buorástahttit ministariid
Ávvudoaluide leat bovdejuvvon guokte máná juohke Suoma 309 gielddas. Dilálašvuohta ordnejuvvo Helssegis, Säätytalos.
Stáhtaministtar Sanna Marin lassin dilálašvuhtii oassálastet maiddái ruhtadoalloministtar Annika Saarikko, riekteministtar Anna-Maja Henriksson sihke biras- ja dálkkádatministtar Maria Ohisalo. Ministarat buorástahttet buot gussiid dilálašvuođa álggus.
Dán jagáš temán lea boahttevuođa dahkkit.
Yle sáddii streamsáddaga báikki alde Säätytalos diibmu 15 rájes. Sáddagis oaidnit, makkár dovdduiguin mánat leat oassálastimin ávvudoaluide ja gullat mánáid jurdagiid doaluin. Sáddaga sáhttá geahččat maid maŋŋelgihtii.