Guvttiid koronaáiggi juovllaid maŋŋá lea gávppašeapmi rádjagávppiin fas lassáneamen. Dán oidnet rádjagávpejasat Eanodaga Gilbbesjávrris ja Anár Njávdámis.
Rádjagávppašeapmi máhcai masá normála dillái guovvamánus 2022, go Norga ja Suopma heite visot koronaráddjehusaid rájá alde, muitala gávpejas Mikko Rousu Gilbbesjávrris.
– Guovvamánu rájes leamaš áibbas normála vuovdinlogut ja dienas gávppašeamis, dat lea juo jagi 2019 dásis, muitala Rousu.
Gávpejasaid stuorámus sávaldat lea, ahte ráját bissot rabas johttiide. Borramušgálvvu hattis lea dál stuorra erohus Norgga ja Suoma gaskkas.
– Norggas lea borramuš mealgat divrasut go Suomas, muhto eandalii boarrásut olbmot veardádallet baicce ruvnnu gurssa euroin. Duohta lea ahte gurssaid veardidettiin gálvohattiid erohus dássána, árvala gávpejas Juha-Matti Lias Anár Njávdámis.
Gilbbesjávrri gávpejas oaidná dál koronajagiid maŋŋá buriid áiggiid rádjagávppašeamis.
– Jus fal rádjá bissu rabas, de iihan dát rádjagávppašeami gal gosage jávkka, luohttá Mikko Rousu.
Gálvohattiid veardádallamat dán čakčadálvve čájehit, ahte eandalii biergu, vuoncámonit, mielkebuktagat ja šattut leat divron. Suoma ja Norgga hattiid gaskkas lea erohus.
– Dál goittot ain Norgga olbmot ostet juovllaide bierggu ja mielkebuktagiid sihke šattuid ja láibbige ollu Suoma bealde, logahallá Juha-Matti Lias ovdamearkan dain gálvvuin, maid sii vuvdet Norgga beallái.
Norgga bealde Kárášjogas gávpejas Jon Vegard Holm Balto lea vuohttán, ahte sin gávppis olbmot ostet dál eambo hálbbit borramušgálvvuid go diibmá.
– Dálhan lea buot divron, elrávdnji ja reantu ja gálvvut mákset eambo go ovdal, ja dalle olbmot háliidit daid hálbbimusaid, seastit ruđa gokko sáhttet, dadjá Holm Balto Kárašjogas.
Yle Ođđasiid Sámis ja Beaivvi ságaid sáhtát maid guldalit Yle Areenas.