Borramuš máksá Suomas dál gaskamearálaččat 16 prosentta eanet go jahki dassá – Hilma Länsman máksá borramušas vahkus 20 euro eambo go ovdal

Borramuš lea divron - máŋggas guđđet ruonas šattuid čiŋahit gávpetiskka

Eallima golut leat lassánan buot euro-riikkain jagis dovdomassii. Borramuš lea divron vel eanet go maid buot golahus gaskamearálaččat.

Inflašuvdnaproseanta muitala nuppástusa ovtta jagis. Maŋimuš loguin skábmamánus 2021 skábmamánnui 2022 oaidná, ahte dan áiggis eallin Suomas lea divron badjel ovcci prosenttain. Dát lohku muitala eallingoluin, das mo ássama, johtima ja borrama hattit leat gorgŋon ovtta jagis.

Eallima divrumii váikkuhit eanemus elrávdnjerehkegat, viesso- ja geavahanloanaid reanttuid loktaneapmi ja dieselboaldámuša alla haddi, dieđiha statistihkaguovddáš.

Go veardida dušše borramuša hattiid de dat lea loktanan dovdomassii – borramušgássa máksá Suomas dál 16 prosentta eanet go jahki dassá. Dat lea binná euroriikkaid gaskaárvvu bajábealde.

Raba gova stuorábun

Divron leat máŋgga bearrašis vealtameahttun borramušgálvvut nu mo eanadoalu buktagat

Yle dahkan haddeveardádallama mielde eanemus leat divron jáffut, vuodja, vuoncámonit, rievnnit ja šattut. Borramušgávppis gollá dál eanet ruhta go jahki dassá, dan oaidná maid Hilma Länsman, go lea gávppašeamin Anáris.

– Mun oainnán, ahte vahkus galgá 20 euro eambo máksit maid ovdal. Nu mun lean rehkenastán. Muhto die lea lihkku, ahte ii dárbbaš bierggu oastit, lea alddes. Na guoli oastán vehá. Muhto dat ruoná diŋggat leat divron hirbmat ollu maiddái.

Hilma Länsman ii oastán dán vuoro ruonas šattuid. Šattuid hattiid veardádallá Anár gávppis maiddái Marika Ruismäki.

– Divron lea, dan mun gal jáhkan go kuitte geahčan. Ollu leat divron heđemat ja eará šattut. Dálge veardidin suopmelaš ja olgoriikalaš gurkka hattiid. Hálidivččen borrat suopmelaš dahje lahka buvttaduvvon borramuša, muhto muhtumin ferte válljet hatti vuođul.

Raba gova stuorábun

Marika Ruismäki lea fuobmán hattiid divruma, muhto inflašuvdnalogut ledje gal stuorábut go maid son lei vuordit.

Jáffoseahkka, mii jahki dassá mávssii guokte euro, máksá dál masá golbma euro. Dat lea divron gaskamearálaččat 47 prosentta. Monitge leat divron badjel goalmmadasain, sullii 36 prosentta.

Yle Ođđasiid Sámis ja Beaivvi ságaid sáhtát maid guldalit Yle Areenas.