Rádjegielddaid ássit leat hárjánan eallit Norgga ruvnnu ja euro mielde. Sii dihtet goappá riikkas gánneha vuojestit deavdimin táŋkka dahje gávppašeamen.
Diibmá álgojagi go boaldámušhattit divro Suomas de suopmelaš táŋkejeaddjit vuoddjájedje Kárášjohkii táŋket. Dál lea dilli goittotge rievdan.
– Diibmá gal ledje hui ollu ovtta gaskka, muhto dál loahppajagi eai leat šat nu ollu leamaš, dadjá kárášjohkalaš bensestašuvnna eaiggát Arne Kristian Balto.
Sivvan Balto lohká kurssaid ja boaldámušhattiid.
– Aiddo dál lea kruvdna hui heittot euro ektui. Dál in vuordde ovttage Suoma kundariin dan ektui gal.
Son čilgesta, ahte mađi heajut Norgga kruvdnu lea, dađi eanet suopmelaččat táŋkejit Norgga bealde. Go fas kruvdnu lea nanus, dalle olbmot eai vuolgge Norgii táŋket.
Bensen mávssii Norggas diibmá gaskamearálaččat 16,52 Norgga kruvnnu ja diesel fas 15,50 Norgga kruvnnu, nappo sullii beannot euro.
Bensen hálbbui Suomas juovlamánus
Suomas badjel guovtti euro boaldámušhattit leamašan juo badjelaš jagi, go Njuorggámis 98E-boaldámuš mávssii 2,010 euro golggotmánus 2021. Hattit leat goittotge molsašuddan dan maŋŋá juoba beivviid mielde guovtti euro guktuid bealde.
Boaldámušaid hattit leat Suomas dál hálbbimus dásis Ukraina soađi álgima maŋŋá. Lagašáiggiid hattit eai olus rievdda, árvalit áššedovdit.
Hattit leat hálbon mannan čavčča rájes. Juovlamánus bensena ja diesela gaskamearalaš haddi lei vuollel 2 euro lihtteris.
Álo ii haddi mearrit táŋkenriikka
Vaikko dávjá olmmoš oastá doppe gos lea hálbbimus, de álo ii haddi mearrit. Kárášjohkalaččat Anders A Gaup ja Áilu Soini Guttorm táŋkeba guktot Norgga bealde.
Gaup lohkáge leat hárjánan táŋket Norggas, leš dál haddi mii beare. Son lea bajon ja sáhttá geahpedit mohtorgielkábensiinnaid vearuhusas.
– Mun in leat gal goasge Suomas táŋken.
Maiddái Guttorm táŋke dušše Norgga bealde. Son ii fina dávjá Suomas, iige dušše beare táŋkema geažil dollešii rájá rastá.
Boaldámuš lea dál hálbbimus Ruoŧas
Vaikko boaldámušat leat hálbon Suomas, de Ruoŧas lea dál hálbbit bensen. Ruoŧa kruvnnu kursa lea dál headju ja danin boaldámuš lea Haaparantas hálbbit go Suoma bealde Durdnosis.
Boaldámuš lea Ruoŧa bealde 20 sentte hálbbit lihtteris otne gaskavahku. Haaparantas 95E-bensen máksá otne 19,49 kruvnnu. Beaivvi kurssa mielde dat šaddá 1,75 euro. Durdnosisges hálbbimus bensen máksá 1,938 euro.