Báikkálaš eaktodáhtolaččat leat plánen ja duddjon ođđa girkotekstiillaid čiŋahit Ohcejoga girku sámeivnniiguin. Plánemis leat muitán maid geavatlašvuođa.
Ohcejohkalaččat movttiidedje ovttas duddjot, vuos Sámi oahpahusguovddáža girkotekstiillaid duddjonkurssas ja dál kurssa maŋŋá vel searvegotti goarrunrieggás. Kurssa ja goarrunrieggá oahpaheaddjin lea doaibman Ohcejoga girkohearrá Päivi Aikasalo.
– Dáppe lea somás joavku movttegis nissonolbmot, geat leat movttiidan váibmoláđis iluin plánet ja duddjot girkui čiŋahantekstiillaid, illuda Aikasalo.
Aikasalo deattuha erohusa liturgalaš tekstiillain ja girku čiŋahantekstiillain.
– Mii eat leat duddjon daid liturgalaš tekstiillaid, muhto girkui čiŋahantekstiillaid, ja dain lea earru. Ivnnit leat heivehuvvon liturgalaš tekstiillain ja dat leat sámeivnnit.
Lahja Guttorm Nuvvosis ja Bertta Katekeetta-Kulju Dálvadasas leaba leamašan duddjomin, muhto soai eaba lean plánenbarggus fárus. Guttorm lea duđavaš dasa, ahte girku garra beaŋkkat leat dál vuohkkasat čohkkát.
– Dás lea hui buorre čohkkát go lea linis ja liekkas. Mun ledjen sotnabeaivve dáppe girkostallamiin ja buolaš lei badjel guoktelogi gráda. Man somá lei čohkkát daid beaŋkkaid aldi, go girkuhan ii leat nu liekkas.
Katekeetta-Kulju maid liiko ođđa girkotekstiillaide, maiguin girku leat čiŋahuvvon.
– Mu mielas dat ledje čábbát. Ja liikojin dasa, ahte ivnni buvttii girkui ja lea liekkas čohkkát beaŋkkaid aldi, Katekeetta-Kulju oaivvilda.
Muđui olbmot leat bures váldán vuostá ođasmahtton girkotekstiillaid, vaikko sosiálalaš medias leage beaggán iešguđetlágan oainnut.
Aikasalo muitala, ahte muhtin veardde lea boahtán negatiivvalaš máhcahat. Soapmásat leat ovdamearkka dihtii moaitán dan, ahte muhtin mállet eai leat Ohcejogas ja gáibidan eanet báikkálašvuođa.
Lahja Guttorm mielas Ohcejoga leahki dihtto ođđa tekstiillain ovdamearkka dihtii beaŋkkaid alde.
– Doppe leat gorrojuvvon dat vuoddagat ja dat báttit, mat lea geavahuvvon.
Son oaivvilda, ahte mielat leat máŋggaláganat, muhto daid ferte váldit vuostá.
– Eat mii sáhte buot olbmuid miela miel ráhkadit.