Yle lágidan Ođđa musihka gilvu UMK láidestuvvo maiddái dán jagi sámegillii. Anáraš- ja davvisámegielat láidesteami lea vejolaš čuovvut Yle Areena bokte.
Suoma stuorámus musihkkashowan rámiduvvon Ođđa musihka gilvu lea buot musihkadahkkiide rabas gilvvohallan, mas ohcet dan buoremus suopmelaš bihtá. Dat galgá dasto ovddastit Suoma maŋŋelabbos dán jagi Eurovision-lávlungilvvohallamis.
Anárašgillii gilvvu láidesta Heli Huovinen ja davvisámegilliiges Linda Tammela. Yle Sámi doaimmaheaddjiguovttos beasaiga juo diibmá leat mielde láidesteame UMK ja vuordiba dán jagaš gilvvu gealdagasain.
– Oaččuime diimmá sáddagis olu buori ja positiiva máhcahaga geahččiin ja lean hui ilus, ahte gilvu láidestuvvo sámegillii maiddái dán jagi, dadjá Huovinen.
Tammela oaivvilda, ahte guoimmuhanprográmma láidesteapmi sámegillii lea dehálaš vejolašvuohta viiddidit sámegiela geavahanlávddiid.
– Lean giitevaš, ahte moai besse dán juo nuppádassii dahkat ja sávan dát šaddá árbevierrun, dadjá Tammela.
”Gilvvu dássi loktanan jagis jahkái”
UMK:s gilvalit dán jagi Keira, Benjamin, Robin Packalen, Lxandra, Käärijä, KUUMAA ja Portion Boys. Yle lea juo almmustahttán oasi gilvobihtáin Yle Areenas.
UMK vuoiti ovddasta Suoma Eurovision-lávlungilvvus Stuorra-Británnia Liverpoolas miessemánus. Dábálaččat Eurovision-gilvu lágiduvvo čuovvovaččat ain dan riikkas, mii vuoitá gilvvu. Vaikko diibmá gilvvu vuittii Ukraina, de Ruošša falleheami ja soahtedoaimmaid geažil Eurovision-gilvvu eai sáhte lágidit dál Ukrainas.
UMK lea šaddan hui bivnnuhis gilvun maiddái musihkkaindustriija geahččanguovllus. Diibmá buot UMK-bihtát loktanedje Suoma Spotify Top 50 -listui ja dat leat guldaluvvon dán rádjai oktiibuot badjel 31 miljovnna geardde.
– Jagis jahkái Ođđa musihka gilvvu dássi lea beare loktanan. Dál dat lea gilvu ja prográmma, masa artisttat háliidit searvat, dasgo dan bokte olles álbmot dovdá sin ja sii ožžot stuorra, riikkaviidosaš fuomášumi, dadjá Tammela.
Ođđa musihka gilvu lágiduvvo Turkus lávvardaga 25.2. diibmu 21.00. Televišuvnnas dát dáhpáhus láidestuvvo suomagillii.
Yle prográmmabálvalusa Yle Areena bokte dat goit láidestuvvo maid anáraš- ja davvisámegillii, seavagillii ja eaŋgals-, ruoŧa-, ukraina- ja ruoššagillii.