Roavvenjárggas Ohcejohkii ii leat šat linnjábiilaoktavuohta árgabeivviid.
Roavvenjárgga ja Avvila gaskasaš oktavuođa áigetávval lea jagi álggus rievdan nu, ahte bussiin ii šat geargga nuppi bussii, mii joatká Avvilis Ohcejohkii. Vahkuloahpas lávvardagaid ja sotnabeivviid vel beassá. Maiddái oktavuohta Ohcejogas lulás doaibmá ain.
Ohcejohkalaš Anni Ahlakorpi muitala, ahte go Roavenjárggas viggá boahtit Ohcejohkii, nu mátki bisána Avvilii. Doppe ferte de idjadit ja čuovvovaš jándor bealde beassá fas joatkit mátkki. Nubbi vejolašvuohta lea riŋget soapmása viežžat 125 kilomehtera duohkin.
Guovlostivraáirrasin Ahlakorpi láve johtit linnjabiillain čoahkkimis lullelis oalle dávjá.
Ovdamearkan son muitala, ahte jus guovlostivrras lea čoahkkin mánnodaga, son vuolgá mátkái jo sotnabeaivve linnjabiillain, vai olle Roavenjárgii eahkes. Jus mánnodaga čoahkkin ii bisttálii guhká, son njuikestivččii linnjabiilla giktii, idjadivččii Avvilis ja joatkkálii mátkki čuovvovaš beaivve. Dalle son šattalii leat barggus eret guokte beaivve ovtta čoahkkima dihte. Jus čoahkkin fatná guhkibun, šattalii son leat golbma beaivve barggus eret.
– Dat orro gal viehka ollu, dadjá Ahlakorpi.
Son jurddaša, ahte livččii lean váttis, jus studeantaáigge livččii dákkár dilli leamašan, go ii leat earáge vejolašvuohta go linnjábiillain johtit.
Linnjábiilafitnodat hálidii fállat buoret oktavuođa Lulli-Suomas davás
Roavvenjárggas Avvilii vuodjá Onnibus ja Avvilis Ohcejohkii fas Jbus, ja dáid áigetávvalat eai dál deaivva oktii.
Áigetávvalat rivde dán jagi álggus. Lappi EJB-guovddáš dagai linnjábiilavuoruin gilvvohallama, ja dan geažil Onnibus massii ovtta vuoru Muonio ja Gilbbesjávrri gaskkas. Danin šattai Onnibus-fitnodat jurddašit, mot sáhtášii buoremus vuogi mielde oažžut mátkkošdeaddiid, muitala Onnibus-fitnodaga gávppálaš jođiheaddji Petteri Rantala Yle Sápmái šleađgaboastta bokte.
Onnibus čovddii ášši nu, ahte sii dahke mátkkoštanoktavuođa Helssegis ja Jyväskyläs sihke Avvila ja Muonio guovlluide.
– Dákkár mátkkoštanoktavuođa ii leat ovdal sáhttán fállat. Čoavddus šattai das, go sirddiimet vuolgima Roavvenjárggas davás diimmu maŋŋelii, čilge Rantala.
Áiddo dát diibmu dagahii dan, ahte dál mátkkošteaddji ii geargga šat biilii, mii vuolgá Avvilis Ohcejohkii.
– Dat, ahte mátki gaskkalduvvo Avvilii, ii leat optimála, muhto jos mii dušše rievdadit áigetávvaliid ruovttoluotta nu mot lei, dalle mii massit mátkeoktavuođa Lulli-Suomas Davvi-Supmii, čállá Rantala.
Jbus fas ii sáhte maŋidit vuolgima, go dat galgá geargat skuvlasáhtuid vuodjit.
Ságastallan EJB-guovddážiin ja Ohcejoga gielddain lea dál jođus
Joavkojohtolatáššedovdi Mikko Tervo muitala, ahte sii leat EJB-guovddážis diđolaččat dán váttisvuođas, mii lea geavvan áigetávvaliid rievdadeami dihte. Čovdosa dasa leat ohcamin ovttas Ohcejoga gielddain. Ságastallan lea dál jođus.
– Mun jáhkán, ahte dasa gávdno áigetávvalčoavddus, ahte oažžut dan mátkkoštanoktavuođa doaibmat, muitala Tervo.
Davvin eará guovlluin eai aiddo dákkár čuolmmat gávdno, muhto olles Suoma boaittobeal gilážiin leat heajos joavkomátkkoštanoktavuođat, čilge Tervo. Dákkár váttisvuohta goittot ii leat ovdal leamaš, ahte Roavenjárggas ii beasa johtit seamma jándor áigge.
– Áinnaš geahččalit dál divvut dan dili, lohpida Tervo.