Sämitige kulttuurlävdikode ive 2023 kulttuurtorjuuh láá juohhum. Musijkkár Aimo Aikio uážui 3 000 euro išeruuđâ já juátká anarâš- já nuorttâlâškielâlii muusik rähtim.
Aikio arvâl, ete pitáh šaddeh valmâšin taan ive ääigi. Lavluuh muštâleh rähisvuođâst já taid kuldâlmáin kolgâččij kavnuđ vástádâs toos, mii lii rähisvuotâ.
– Mučis lavluuh láá puátimin. Puoh säänih iä lah val aaibâs valmâšeh, mutâ forgâ kuittâg, muštâl Aikio.
Jyehi muusikrähtee ocá inspiraatio kostnii, ovdâmerkkân luándust teikkâ eres ulmuin. Taid rähisvuotâlavluid inspiraatio addel Aikio pelikyeimi.
Taan ive ennuv išeruuđah muusiksuárgán
Aimo Aikio ij lamaš eissigin áinoo musijkkár, kote uážui Sämitiggeest kulttuurtorjuu. Taan ive pottii ennuv ucâmušah muusiksuárgán já musikkân mieđettii-uv ennuv torjuid, muštâl Sämitige kulttuurčällee Riitta Orti-Berg.
Sämitigge mieđettij taan ive kulttuurišeruuđâid ohtsis 236 000 euro oovdâst. Anarâškielâ- já kulttuursuárgán mieđettii išeruuđâid ovdâmerkkân kiirján mii muštâl Movsháá (su.Tirro) historjást, anarâš tuojij tuoijuumân já almostittemtorjuu anarâškielâlii tihtâkiirján, nooveelantologian já Loostâš-digiloostân. Anarâšah servi já Anarâškielâ servi ožžuu Sämitiggest seervij toimâmtorjuu.
Puáttee ive uuccâmproosees kolgâččij leđe čuuvtij älkkeb, ko kulttuurišeruttâvuáhádâh lii viijmâg-uv uđâsmittum digitaallâš háámán.
– Tot taha älkkeebin nuuvt occei ko meid kulttuurlävdikode pargo, Orti-Berg illood.
Luuvâ listo puoh mieđettum išeruuđâin Sämitige nettisiijđost.
Anarâš saavâid puáhtá kuldâliđ meid Yle Areenast.